“Nazirlik qanunsuz ağac kəsimi ilə bağlı sərt tədbirlər görür, lakin ağac kəsintisinin tam aradan qaldırılması üçün hər kəsin bu işdə bizə yardımçı və dəstək olmasını gözləyirik”. 

Bu sözləri Ekologiya və Təbii Sərvətlər Nazirliyinin Mətbuat xidmətinin rəhbəri İradə İbrahimova mətbuat konfransında deyib.

O qeyd edib ki, nazirlik yaşıllıqlara göstərilən biganə münasibəti təkidlə pisləyir:

“Ölkə ərazisində yaşıllıqların mühafizəsi və qorunması olduqca vacib və prioritet məsələ kimi daim gündəlikdədir.

Hesab edirik ki, Nazirlik tərəfindən görülən tədbirlərlə yanaşı,  təbiətə, yaşıllığa ziyan vuranların cəmiyyət tərəfindən də qınaq obyektinə çevrilməsi, tənbeh olunması davam etdirilməlidir. Çünki çox vaxt ictimai tənbeh inzibati tədbirlərdən daha təsirli olur. Nazirlik ağacların kəsilməsini, yaşıllıqlara göstərilən biganə münasibəti təkidlə pisləyir və təbiətə ziyan vuranlara qarşı bundan sonra da  qəti və barışmaz mövqe nümayiş etdirəcək.

 Bu gün deyə bilərik ki, görülən tədbirlərin müəyyən nəticəsi var. Aparılan statistika və müşahidələr göstərir ki, son aylarda Respublika ərazisində ağac kəsintisi faktları xeyli azalıb. Bu tendensiya, həm meşə sahələrində, həm də yaşıllıq massivlərində müşahidə olunur. Ağac kəsintisi hallarının azalması Nazirliyin sərt və qətiyyətli mövqe nümayiş etdirməsi ilə bərabər, eyni zamanda vətəndaşların, ictimaiyyət nümayəndələrinin və media orqanlarının da fəallığı ilə əlaqədardır”.

Oxumağa dəyər:   ATƏT Azərbaycan-Ermənistan dövlət sərhədində monitorinq keçirəcək

Ekologiya və Təbii Sərvətlər Nazirinin müavini Firdovsi Əliyevin sözlərinə görə, son 3 ay ərzində ağac kəsintisi nəzərə çarpacaq dərəcədə azalıb:

“Bu ilin son 6 ayı ərzində Bakı şəhəri ərazisində 61 ağacın icazəsiz kəsildiyi, 98 ağacın isə zədələndiyi aşkar edilib. Bununla bağlı 59 təqsirkar  şəxsə 71800 manat məbləğində cərimə, 23745 manat məbləğində ziyan tətbiq olunub. 40 fakt üzrə təqsirkarların tapılması və qanunamüvafiq tədbir görülməsi üçün polis orqanlarına müraciət edilib. 

Müqayisə üçün bildirək ki, son 3 ay ərzində isə 12 ağacın kəsildiyi, 14 ağacın zədələndiyi müəyyən edilib. Rəqəmlər də bunu deməyə əsas verir ki, son 3 ayda ağac kəsintisi nəzərəçarpacaq dərəcədə azalıb”.

İstinadlar Qafqazinfo