Noyabrın 8-də “Azərbaycan Respublikasının Dövlət Gömrük Komitəsi və Azərbaycan Milli Elmlər Akademiyası arasında əməkdaşlığa və qarşılıqlı fəaliyyət göstərilməsinə dair Anlaşma Memorandumu” imzalanıb.

Azərbaycan Milli Elmlər Akademiyası Rəyasət Heyətinin binasında keçirilən imzalanma mərasimində Dövlət Gömrük Komitəsinin sədri, gömrük xidməti general-leytenantı Səfər Mehdiyev, AMEA-nın prezidenti, akademik Akif Əlizadə, Komitə sədrinin müavinləri, AMEA Rəyasət Heyətinin üzvləri və digər rəsmi şəxslər iştirak ediblər.

İmzalanma mərasimindən öncə çıxış edən akademik Akif Əlizadə iki qurum arasındakı əməkdaşlığın və qarşılıqlı fəaliyyətin gücləndirilməsi işində yeni mərhələyə qədəm qoyulduğunu və imzalanacaq memorandumun Azərbaycanda  elmin, gömrük işinin, fiskal siyasətin, ümumilikdə milli iqtisadiyatın inkişafında mühüm rol oynayacağına əminliyini ifadə edib.

Səfər Mehdiyev memorandumun iki qurum arasındakı əlaqələrin səmərəliliyinin artırılmasında mühüm rol oynayacağını, AMEA-nın apardığı araşdırmaların, əldə etdiyi elmi nailiyyətlərin müxtəlif elm sahələrini özündə birləşdirən gömrük  işinin effektivliyinin artırılmasına, gömrük əməkdaşlarının potensialının gücləndirilməsinə təkan verəcəyini bildirib.

Oxumağa dəyər:   Azərbaycandan sonra daha bir ölkə onu "qara siyahı"ya saldı

Mərasimdə Dövlət Gömrük Komitəsinin Akademiyasının rəisi Qulu Novruzov “Gömrük xidməti: ictimai şəffaflıq, açıq tədqiqat resursları” adlı təqdimatla çıxış edib.

Daha sonra AMEA Rəyasət Heyətinin üzvləri İsa Həbibbəyli, Əhliman Əmiraslanov, Rasim Əliquliyev və  İradə Hüseynova  çıxış edərək qarşılıqlı əməkdaşlığın istiqamətləri və faydaları barədə rəy və təkliflərini bildiriblər.

Memorandumu Dövlət Gömrük Komitəsinin sədri, gömrük xidməti general-leytenantı Səfər Mehdiyev və AMEA-nın prezidenti, akademik Akif Əlizadə imzalayıblar.




İstinadlar Qafqazinfo