“Eurovision 2011” qalibi Nigar Camal və Əməkdar artist Aygün Bəylər növbəti duetini təqdim edib.

Sənətçilərin “Şəhidlər” adlı klipi “Youtube” video portalında paylaşılıb. Musiqisi İsmayıl Əsədova, sözləri Zəminə Xınalıya məxsus mahnının videosunda Vətən müharibəsinin və şəhidlərimizin görüntüləri yer alıb.

“Vətən müharibəsi zamanı hər kəs xalqa, vətənə faydalı olmağa çalışdı. Biz sənətçilər isə sənətimizlə dərdinizə şərik olmaq istədik. Əməkdar artist, sevimli sənətkar Aygün Bəylərlə növbəti duetimizi Vətən üçün canından keçən igidlərimizə həsr etdik”, – deyə Nigar Camal bildirib.

Qeyd edək ki, mahnının videosu Rasif Əliyevə, aranjimanı isə Samir Sultanova, yayım hüququ isə “mikpro”ya məxsusdur. Onu da bildirək ki, müğənnilər bundan öncə “Nəfəsim, qəlbim” adlı duet təqdim etmişdilər.

Müdafiə Nazirliyi Zəngilan rayonunun Keçikli kəndindən videogörüntülər paylaşıb.

“Report” həmin görüntüləri təqdim edir:

Türkiyə ilə Azərbaycanı birləşdirən daha bir layihənin – “Qardaşlıq dastanı” müziklının hazırlıq mərhələsi başa çatmaq üzrədir.

Bu barədə layihənin müəllifi Serhat Turak “Haber global”a müsahibəsində bildirib. Onun sözlərinə görə, “Bir millət, iki dövlət” müziklı iki ölkənin ortaq tarixini, mədəniyyətini, mübarizəsini özündə əks etdirən qardaşlıq dastanı olacaq.

“Bu müzikl Türkiyə və Azərbaycanın keçmişdən bu günə qədər ən önəmli tarixi hadisələrini özündə əks etdirəcək. Məhmət Akif Ərsoydan Əhməd Cavada, Mövlanadan Nizami Gəncəviyə, tarixin ilk türk qadın hökmdarı Tomrisdən Sara xatuna qədər bütün şəxsiyyətlərdən bəhs ediləcək. Müziklda hər iki ölkədən 100 nəfərə qədər sənətçi səhnəyə çıxacaq. 8 noyabr Şuşanın işğaldan azad edildiyi gündür. Bu layihəni də qismət olarsa, həmin tarixdə Qarabağın mədəniyyət beşiyi olan Şuşada təqdim etməyi planlaşdırırıq. Türkiyə və Azərbaycanla yanaşı, digər türkdilli ölkələrdə və Avropada da müzikli təqdim etməyi düşünürəm. Rəqs, teatr hesabına iki ölkənin qardaşlığının hansı səviyyədə olduğunu göstərəcəyik. Demək olar ki, 5 ildir bunun üzərində çalışıram. Dünyada bənzəri olmayan bir müzikldır. Burda hər şey ən xırda detalına qədər düşünülüb”.

“Dünən sağ gözümdən əməliyyat olundum və əməliyyat çox uğurla keçdi. Gözümün alt qapağı yox idi, ona dəri köçürüldü və gələcəkdə gözümə protez qoyulacaq. Dövlətimiz sağ olsun ki, bizə diqqət göstərir, əməliyyatımız üçün xarici ölkələrdən həkimlər gətirilir. Hər kəsə təşəkkürümü bildirirəm”.

Bunu jurnalistlərə açıqlamasında “YAŞAT” Fondunun təşəbbüsü, İsrailin Azərbaycandakı səfirliyinin və Zərifə Əliyeva adına Milli Oftalmologiya Mərkəzinin təşkilati dəstəyi ilə İsraildən Azərbaycana tibbi-humanitar yardım məqsədilə gələn oftalmoloqlar tərəfindən əməliyyat olunmuş Vətən müharibəsi qazisi Sərxan Nərimanlı bildirib. 

Döyüş yolu Füzulidən başlanan qazi Qubadlı, Cəbrayıl, Xocavənd istiqamətində qəhrəmancasına vuruşub. Oktyabrın 26-da gözündən, qolundan, ayağından və başından yaralanıb. O, ötən gün keçirilən əməliyyatdan sonra özünü yaxşı hiss etdiyini deyir. 

Gözünün içərisinə okulyar linza yerləşdirilən və israilli donordan göz bəbəyi transplantasiya edilmiş digər qazi Arif Hacıyev də artıq görməyə başlayıb. Qazimiz yavaş-yavaş sağlamlığına qovuşduğunu deyir:

“Mən Bakı şəhərində anadan olmuşam, amma əslən Füzuli rayonundanam. Elə qismət oldu ki, səfərbərlik elan olunandan Füzuli istiqamətində döyüşlərə qatıldım. Bütün əməliyyatlara komandamızla birgə can-başla qoşulduq. Oktyabrın 21-i əks-hücumun qarşısını alarkən döyüş yoldaşlarımla bir yerdə minomyot atəşi nəticəsində qolumdan, gözümdən və bəzi nahiyələrimdən yaralandım. Artıq əməliyyat olunmuşam, şükürlər olsun ki, yavaş-yavaş sağalıram. Buna görə dövlət başçısına, “YAŞAT” Fonduna və fondun reallaşmasında yardımçı olan xalqımıza öz minnətdarlığımı bildirirəm”. 

Qazi deyir ki, gözünün buynuz qişasında problem və katarakta olub. Lakin göz dibinin sağlam olması nəticəsində əməliyyatdan sonra görməsinin müəyyən hissəsi bərpa olunub və getdikcə daha da yaxşılaşacaq. 

Qazilərimizi əməliyyat edən israilli həkim Yişay Falik Azərbaycanda olmaqdan şad olduğunu və humanitar tibbi yardım çərçivəsində onlara dəstək olmağa çalışdıqlarını dilə gətirib:

“Biz 8 nəfərlik tibbi heyət və yerli həkimlərin dəstəyilə qazilərin müayinə və əməliyyatını həyata keçiririk. Qısa müddət ərzində bir çox qazini müayinədən keçirmişik. Onların əksəriyyəti artıq kosmetik protezlərlə təmin olunublar. Həmin protezlər öncədən parametrləri nəzərə alınaraq məxsusi olaraq onlar üçün İsraildə hazırlanıb. Həmçninin müəyyən sahələr üzrə göz əməliyyatları icra olunur. Arif adlı qaziyə kornea əməliyyatı baş tutub. Bu o deməkdir ki, transplantasiya olunmuş göz bəbəyi sayəsində o şəxsin gözü hazırda 20 faiz görə bilir. Mən deyərdim ki, o gözlə sükan arxasında oturub maşın da idarə etmək olar. Dünən bizim çox ağır bir əməliyyatımız baş tutdu. Həmin əməliyyatın müddəti 4,5 saat çəkdi. Hazırda da əməliyyatlar davam edir, qazilərə protezlər yerləşdirilir. Həmin şəxslər qısa müddətdə öz sağlamlıqlarına qovuşacaqlar”.
İsrailli həkimlərə yerli tibb personalı da qoşulub. Milli Oftalmologiya Mərkəzinin Oftalmo-onkologiya şöbəsinin müdiri Ruhəngiz Balayevanın sözlərinə görə, mərkəzdə çalışan tibb personalı gücləndirilmiş iş rejimində çalışır:

“Fevralın 28-dən etibarən İsraildən həkimlər dövlətimizin və “YAŞAT” Fondunun təşəbbüsü ilə bizim mərkəzə təşrif buyurublar. Məqsəd 44 günlük müharibədə gözündən zədə almış qazilərimizin müayinə və müalicəsinini həyata keçirməkdir. Mərkəzdə bunun üçün hər bir şərait yaradılıb. Onlarla birlikdə mərkəzin yüksək ixtisaslı həkimləri böyük və kiçik tibbi personal, anestezioloqlarımız gücləndirilmiş iş rejimində çalışırlar. Hazırda da müayinə və əməliyyatlar davam etdirilir”.

Şöbə müdiri bildirib ki, gözdaxili endoprotezləşmə aparılan qazilərdə bu, ömürlükdür. Üstdən çıxan mobil protezlər isə bir neçə illikdir və müəyyən müddətdən sonra dəyişdirilə bilər. 

İsrailli həkimlərdən ibarət nümayəndə heyəti Azərbaycanda bir həftə ərzində qazilərimizin müayinə və əməliyyatlarını həyata keçirəcək. Artıq həftənin beş günü arxada arxada qalıb.

“YAŞAT” Fondunun rəhbəri Elvin Hüseynovun sözlərinə görə, bu müddət ərzində israilli həkimlər 132 qazimizi müayinə ediblər. Onlardan 22-si əməliyyat edilib, 28 nəfərinə protez göz taxılıb, digərlərinin əməliyyatı isə növbəti günlərdə baş tutacaq.

Gülnar Əliyeva

Foto-Video: Pərvin Zeynal

BBC uzun müddətdən sonra doğma yurduna qayıdan azərbaycanlı Natiq Allahyarov haqqında reportaj hazırlayıb.

Reportajda birinci Qarabağ müharibəsi zamanı ayağından yaralanmış N.Allahyarovun məcburi köçkünlər üçün yataqxanada yaşamasından, bir gün evinə dönməyi xəyal etməsindən və xəyallarının gerçəkliyə çevrilməsindən bəhs edilir.

Dünyanın ən varlı adamı İlon Maska məxsus “SpaceX” şirkəti Marsdakı missiyalar üçün nəzərdə tutulmuş “Starship” kosmik gəmisinin prototipini şaquli vəziyyətdə yerə endirməyi bacarıb, lakin bir neçə dəqiqə sonra o partlayıb.

“Starship SN10” adlanan prototip Boka-Çikada (Texas ştatı) ABŞ-ın şərq sahili vaxtı ilə saat 18:15-də hərəkətə başlayıb. Gəmi bir neçə dəqiqə ərzində 10 km yüksəkliyə qalxıb, daha sonra Boka-Çika kosmodromunun yanına eniş edib. Gəmidə baş verən yanğından sonra partlayış olub.

Qeyd edək ki, daha əvvəlki iki anaoloji sınaqlar zamanı da prototiplər meydançaya eniş etdikdə partlamışdı.

Xəbər verdiyimiz kimi, dünən Ermənistan parlament binasının qarşısında müxalifətin etiraz aksiyası keçirilib.

Aksiya ərəfəsində ölkənin Baş naziri Nikol Paşinyanı qorumaq məqsədi ilə təhlükəsizlik tədbirləri gücləndirilib.

Bununla əlaqədar polis parlamentin həyətində işıq-səs bombası, parlament binasında isə snayperlər yerləşdirib.

Snayperlər ərazidə çəkiliş aparan telekanallardan birinin kamerasına tuş gəlib.

“Naxçıvan Qarnizonu Qoşunlarının 2021-ci tədris ilinə uzlaşma planı”na əsasən tabor, divizion komandirləri və müavinləri ilə komandir hazırlığı məşğələləri keçirilib.

Komandir hazırlığı məşğələlərində əsas diqqət zabitlərin sülh və müharibə şəraitində komandir keyfiyyətlərinin əsasını təşkil edən mənəvi-psixoloji dayanıqlığının qorunmasına və bölmələri idarəetmə bacarıqlarının təkmilləşdirilməsinə yönəldilib.

Tabor, divizion komandirləri və müavinləri ilə keçirilən komandir hazırlığı məşğələlərində 44 günlük Vətən müharibəsində iştirak edən bölmələrin döyüş təcrübəsini özündə əks etdirən praktiki fəaliyyətlər imitasiya edilib.

Tabor və divizionlarda taktiki-sıra məşğələlərinin təşkili və hazırlanması metodikası göstərilib, düşmənin kiçik ölçülü pilotsuz uçuş aparatlarına və dronlarına qarşı mübarizənin üsul və vasitələri nümayiş etdirilib, praktiki fəaliyyətləri icra edən minaatan batareyaları simulyator minaatanlarından atışlar keçiriblər.

Müasir tank texnikalarının gecə şəraitində döyüşdə tətbiqi ilə minalı sahələrdən, süni və təbii maneələrdən keçməklə atəş tapşırıqlarını yerinə yetirməsi praktiki olaraq göstərilib.

Komandir hazırlığı məşğələlərinə cəlb edilmiş zabitlərdən müxtəlif ixtisas və fənlər üzrə məqbullar qəbul edilib.

Məşğələlərin yekununda bildirilib ki, zabitlərin bölmələri idarəetmə vərdişlərinin təkmilləşdirilməsində, müxtəlif silah sistemlərindən və silahlanmaya yeni daxil edilmiş hərbi texnikalardan istifadə bacarıqlarında, məşğələ və təlimlərin keçirilməsi üzrə hazırlıqlarında müsbət nəticələr əldə edilib.

Binəqədi rayonu ərazisində yerləşən marketlərdən birində quraşdırılan içərisində 3953 manat pul vəsaiti olan “E-manat” ödəmə terminalı naməlum şəxslər tərəfindən oğurlanıb.

Ödəmə terminalını oğurlamaqda şübhəli bilinən əvvəllər məhkum olunmuşlar Məmməd Kazımov və Emil Həmzəyev saxlanılıblar.  

Araşdırma zamanı müəyyən edilib k, bu şəxslər oğurluğa M.Kazımovun idarə etdiyi “VAZ-21011” markalı avtomobillə gediblər. Hadisədən əvvəl onlar avtomobilin dövlət qeydiyyat nişanı dəyişdirmək üçün Sabunçu rayonunda başqa bir “Chevrolet” markalı nəqliyyat vasitəsinin nömrələrini oğurlayıblar. Daha sonra idarə etdikləri avtomobilə həmin dövlət qeydiyyat nişanlarını bağlayaraq Binəqədi rayonunda qeyd edilən oğurluq hadisəsini töərədiblər. M.Kazımov və E.Həmzəyev ödəmə terminalını Masazır qəsəbəsi ərazisində yerləşən qəbirstanlığın ərazisində yararaq içərisində olan pulu ələ keçiriblər. E.Həmzəyev hadisədən sonra oğurlanan pulun bir qismi ilə özünə məxsus “Khazar” markalı avtomobilin kredit borcunu ödəyib.

Qeyd edək ki, saxlanılan şəxslərin marketdən ödəmə terminalını oğurladığı anlar müşahidə kameraları vasitəsi ilə anbaan qeydə alınıb.

Bu şəxslərin ətraflarında araşdırma aparılan zaman onların elə həmin gün Nəsimi rayonunda yerləşən mağazalardan birindən 400 manat oğurladıqları məlum olub.

Dövlət Gömrük Komitəsinin Əməliyyat-İstintaq Baş İdarəsinin əməkdaşları Azərbaycanın gömrük ərazisinə qaçaqmalçılıq yolu ilə gətirilmiş xeyli miqdarda aksiz markası olmayan siqaretlərin realizə edilməsinin qarşısını alıblar.

DGK-dan verilən məlumata görə, İdarənin Narkotiklərlə mübarizə şöbəsinə əvvəlcədən daxil olan məlumat əsasında keçirilən əməliyyat tədbiri nəticəsində, Bakı şəhəri Nəsimi rayonu ərazisində Azərbaycan vətəndaşı idarə etdiyi “Kia Sorento” markalı nəqliyyat vasitəsində olan siqaretləri şərti alıcı qismində cəlb edilmiş gömrük əməkdaşına satmaq istəyərkən saxlanılıb.

Yoxlama zamanı nəqliyyat vasitəsinin arxa yük yerində 5 ədəd karton qutuların içərisində Azərbaycana məxsus aksiz markası olmayan 1470 qutu “Parliament Silver Blue”, 1030 qutu “Parliament Agua Blue” markalı siqaretlər həmçinin, avtomobilin arxa yük yerinin döşəməsinin altında olan zavod konstruksiyasında nəzərdə tutulmayan boşluqdan 990 qutu “Marlboro Touch”, 20 qutu “Sobranıe superslims less smoke smell”, 4 qutu “Marlboro touch less smell” markalı siqaretlər aşkar edilib.
Avtomobilin sürücüsü şifahi sorğu-sual zamanı Abşeron rayonu, Masazır qəsəbəsində qohumunun yaşadığı fərdi yaşayış evində əlavə olaraq Azərbaycan Respublikasına məxsus aksiz markası olmayan siqaretləri saxladığını bildirib.

Dərhal əməliyyat tədbirləri davam etdirilərək qeyd edilən əraziyə baxış keçirilib, daha 8 ədəd karton qutularda Azərbaycan Respublikasının müvafiq aksiz markası ilə markalanmayan 1000 qutu “Parliament Silver Blue”, 500 qutu “Parliament Agua Blue”, 1980 qutu “Marlboro touch” və 500 qutu “Marlboro double mix” markalı siqaretlər aşkar edilib.

Bununla da, hüquqpozma predmeti olaraq, ümumilikdə 7494 qutu xarici markalı siqaretlər aşkar edilərək götürülüb.

Daxili İşlər Nazirliyi dünən axşam saatlarında Bakının mərkəzində quzuya uşaq bezi taxaraq gəzdirən iki gəncin saxlanılması ilə bağlı məsələyə münasibət bildirib.

DİN Mətbuat xidmətinin rəisi, polis polkovniki Ehsan Zahidov bildirib ki, həmin şəxslər quzu gəzdirdiklərinə görə yox, insanların toplaşmasına səbəb olduqları üçün şöbəyə aparılıblar: “Həmin şəxslərə izah olunub ki, xüsusi karantin rejimi qaydalarının pozulmasına yol verə biləcək hərəkətlər qadağandır. Pandemiya dövründə insanların sıx toplaşmasına səbəb olan hərəkətlər etdiklərinə görə ərazidən uzaqlaşdırılıblar.

Onlarla profilaktik söhbət aparılıb və sərbəst buraxılıblar. Həmin şəxslər cərimə edilməyib”.

Bakının mərkəzində maraqlı hadisə baş verib.

Iki gənc quzuya uşaq bezi taxaraq mərkəzi küçələrdə gəzdiriblər.

Bu zaman onları polis əməkdaşları saxlayıb. Hadisə şahidlərinin sözlərinə görə, həmin gənclər polis bölməsinə dəvət olunublar.

Sözügedən video sosial şəbəkələrdə də geniş yayılıb. Gənclərin əməlində intizam məsuliyyəti olub-olmadığı müzakirələrə səbəb olub.

“Şuşa bizim şəhər olmayıb. Oranı əsgərləri ilə birlikdə sparapetlər zəbt etmişdi”.

Bunu ötən gün Ermənistanın Respublika meydanındakı mitinqində Baş nazir Nikol Paşinyanın tərəfdarlarından biri deyib.

“Əlbəttə, Şuşa da, Qarabağ da Azərbaycanındır”, – deyə aksiyanın qadın iştirakçısı bildirib. Onun bu açıqlaması sosial medianın Ermənistan seqmentində geniş yayılıb.

Müdafiə Nazirliyi Füzuli rayonunun Üçbulaq kəndindən videogörüntülər paylaşıb. 

“Qafqazinfo” həmin videogörüntüləri təqdim edir: 

Azərbaycanın ərazi bütövlüyü uğrunda Silahlı Qüvvələrimizin bölmələrinin əks-hücum həmlələri ilə başlayan, işğalda olan torpaqlarımızın azad olunması nəticələnən II Qarabağ müharibəsində böyük qəhrəmanlıq göstərən igid oğullarımızdan biri də Murad Əhmədovdur.

“Report”un Yuxarı Şirvan bürosunun əməkdaşları qazinin yaşadığı Kürdəmirin Qağacılı kəndindəki evinə baş çəkib və Vətən müharibəsi könüllüsü Murad Əhmədovla həmsöhbət olublar.

Murad İlqar oğlu Əhmədov 17 noyabr 1998-ci ildə Qağacılı kəndində dünyaya gəlib. Orta məktəbi bitirdikdən sonra Muradın da müqəddəs hesab etdiyi vətən qarşısındakı borcu – hərbi xidmətə yollanıb. Həqiqi Hərbi Xidmətini başa vurduqdan sonra təxris edilib. Xidməti dövründə nizam-intizamı və vətənpərvərliyi ilə komandir və rəislərinin diqqətini cəlb edən Murad yoldaşları arasında da böyük hörmət qazana bilib.

Murad Əhmədov II Qarabağ müharibəsinin ilk günlərindən könüllü olaraq ön cəbhədə döyüşlərə başlayıb. Ağdam, Füzuli, və Xocavənd istiqamətlərində gedən döyüşlərdə iştirak edən Murad düşmənin xeyli sayda texnikası və canlı qüvvəsini məhv edib. O, Xocavənd istiqamətində gedən ağır döyüşlər zamanı yaralanıb.

Aldığı ağır yara səbəbindən hazırda yeriməkdə çətinlik çəkir. O, yenidən əvvəlki sağlamlığına qovuşmaq və işləyib ailəsinə maddi dəstək olmaq istəyir. Ümid edir ki, aiddiyyatı qurumlar qəhrəman qazimizə də diqqət ayıracaqlar.

Məlumat üçün bildirək ki, Azərbaycan Respublikasının Prezidenti, Müzəffər Ali Baş Komandan İlham Əliyevin sərəncamı ilə “Füzulinin azad olunmasına görə”, “Xocavəndin azad olunmasına görə” və “Cəsur döyüşçü” medalları ilə təltif edilib.

Sərbəst fəaliyyət göstərən (freelancer) amerikalı jurnalist Patrik Lankaster özünün YouTube kanalında Yerevandan reportajları davam etdirir.

P. Pankasterin növbəti reportajı ötən gün martın 1-də axşam Yerevanda yürüş-mitinq keçirən “Sasna tsrer” millətçi-terrorçu qruplaşmasının üzvləri barədədir. Həmin qruplaşma əslində Nikol Paşinyanın siyasi müttəfiqləridir, amma dünən axşam Yerevanda hakimiyyət və müxalifət tərəfdarlarından ayrıca aksiya təşkil etmişdi.

Patrik Lankaster millətçi marşların sədaları altında yürüş edən “Sasna Tsrer” üzvlərindən birini sorğu-suala tutur:

– Deyin, burada nə baş verir?

– Bilmirəm, bu tədbiri ingiliscə necə adlandırmaq olar. Lakin siz əhəmiyyətini görürsünüz. Biz azadlığımız uğrunda yürüşə çıxmışıq, çünki bizim ölkəni Rusiya işğal edib, bu yaxınlarda isə üstəlik Azərbaycan tərəfindən işğal edilib…

Həmin millətçi erməni əlavə edir ki, Ermənistan 100 ildən artıqdır rus işğalı altındadır. O, Rusiyanı üstəlik “arsaxı Azərbaycana verməkdə” ittiham edir. “Ona görə də bizim etirazımız Rusiya işğalına qarşıdır”,-erməni nasist vurğulayır.

Əlavə edir ki, küçənin o tərəfindəki hər iki mitinq (müxalifət və hökumət tərəfdarlarının mitinqi) Rusiyanın maraqlarını təmsil edir. Onların etirazı isə “erməni xalqının yeganə səsidir”.

– Siz hesab edirsiniz ki, Ermənistan üçün Rusiyasız daha yaxşı olacaq?

– Bəli, Rusiya Ermənistanın düşmənidir və bizim ölkəmizi 1920-ci ildə işğal edib. Biz müstəqil ölkə idik və beynəlxalq ictimaiyyət tərəfindən tanınmışdıq, onlar isə bizi işğal etdilər.

– Axı bir çox ermənilər Rusiyanı sevir?!

– Bəli, çünki onlar işğal altındadırlar. Onlar (ruslar) hər şeyə nəzarət edir, maliyyə işlərinə, orduya. Bir çox razılaşmalar imzalanıb və nəticədə bizim müdafiə sistemimiz çöküb. Bu müharibədə erməni silahları ilə bağlı çoxlu problemlər ortaya çıxdı. Paşinyan dedi ki, bir çox silahlar ümumiyyətlə işləmədi. Cəmi 10 faiz işləyə bildi (Paşinyanın “İsgəndər”lər haqda məlum bəyanatını nəzərdə tutur), bu da onu göstərir ki, Rusiya düşməndir.

Həmin erməni özünü “Sasna Tsrer” qruplaşmasının da daxil olduğu “Milli demokratik ittifaq” adlı hərəkatın üzvü kimi təqdim edir. Bildirir ki, onlar Qaregin Njdenin (erməni faşisti və müasir Ermənistan dövlətinin ideoloji atası) heykəlinin qarşısına toplaşıblar, “Rusiya işğalına son qoyulmasını” tələb edirlər…

Azərbaycan və Türkiyə kino sahəsində əməkdaşlığa hazırlaşır.

Bu barədə Türkiyədə səfərdə olan mədəniyyət naziri Anar Kərimov “TRT Haber”ə açıqlamasında bildirib.

Nazir qeyd edib ki, müharibədə qəhrəmanlıq göstərən əsgərlər barədə film çəkiləcək:

“30 il işğal altında olan torpaqlarımızı azad etdik və savaşda qəhrəman əsgərlərimizin şücaətini daha təsirli səviyyədə göstərmək üçün kinolara ehtiyac var. Bu məqsədlə türk qardaşlarımız və istehsalçı şirkətlər ilə ortaq layihələr həyata keçirməyi çox istəyirik. Türkiyənin bu sahədəki təcrübələrindən Azərbaycan da istifadə edəcək”.

Bundan əlavə, A. Kərimov vurğulayıb ki, işğaldan azad edilən torpaqlarda tarixi abidələrin bərpası prosesi də Türkiyə ilə birgə həyata keçiriləcək.