Moldovanın eks-prezidenti İqor Dodon “Georgi lenti” lentini taxdığına görə təxminən 470 dollar cərimə olunub.

Bu barədə o, feysbuk səhifəsində yazıb. Dodonun sözlərinə görə, bu qərara etiraz etməyi planlaşdırır. 

“Hakimiyyət polisə tapşırıb ki, mənim adıma protokol tərtib etsin. Mən ölkə rəhbərliyindən bu sui-istifadəyə bütün məhkəmə instansiyalarında etiraz edəcəyəm. Bu antikonstitusiya qanunu nəhayət ləğv ediləcək”, – Dodon yazıb.

Onun sözlərinə görə, lentə qoyulan qadağa təkcə Konstitusiyaya zidd deyil, həm də ayrı-seçkilik, antidemokratik xarakter daşıyır və cəmiyyəti süni şəkildə parçalamaq məqsədi daşıyır.

Dodon yazısına protokolun fotosunu əlavə edib. Orada bildirilir ki, cinayəti törədən şəxs “hərbi təcavüz aktları, müharibə cinayətləri və bu cür hərəkətlərin təbliği və ya təriflənməsi kontekstində tanınmış simvol olan Georgi lentini taxıb”.

 

İstinadlar Qafqazinfo