Azərbaycan Respublikasının Moldovadakı Səfirliyi və Moldovadakı Azərbaycanlılar Konqresi (MAK) ilə birgə paytaxt Kişineuda yerləşən “Time” otelinin konfrans zalında Xocalı soyqırımının 29-cu ildönümünə həsr edilmiş anım tədbiri keçirilmişdir. Tədbir Moldovada tətbiq edilən karantin qaydalarının tələblərinə uyğun olaraq təşkil edilmişdir.

Tədbir Xocalı qətliamına həsr edilmiş qısametrajlı sənədli filmin nümayişi ilə başlamışdır.

Tədbirdə Moldova parlamentinin Demokratiya partiyası fraksiyasının sədri Dmitri Diakov, Sosialistlər partiyasının deputatları Odnostalko Vladimir və Nikita Çurkan,Moldovanın Effektiv Siyasət İnstitutunun direktoru, tarix elmləri doktoru, politoloq Vitaliy Andriyevski, Moldovanın Xarici İşlər və Avropaya İnteqrasiya Nazirliyinin əməkdaşları, Moldovada akkreditə olunmuş diplomatik korpusun nümayəndələri, habelə Bolqarıstanın səfiri, Türkiyə, Macarıstan, Rusiya, Ukrayna, BelarusiyaSəfirliklərinin diplomatları, ölkə yaşayan türk, yəhudi, gürcü və digər icmaların nümayəndələri, azərbaycanlı və yerli tələbələr, eləcə də bir sıra Moldova KİV-in nümayəndələri iştirak etmişdir.

Tədbirdə deputat D.Diakov çıxış edərək, ermənilər tərəfindən törədilmiş Xocalı faciəsini pisləmiş, xalqların birgə sülh içində yaşayışının önəmindən danışmış, Moldovanın ərazi bütövlüyü məsələsinə toxunaraq xalqlarımızın oxşar faciələr  yaşadığını qeyd etmiş,qətliamın kədərlə yad edilməsində həmrəylik nümayiş etdirmişdir.

Tədbir zamanı politoloq V.Andriyevski öz çıxışında Moldovanın nüfuzlu ava.md xəbər səhifəsində Xocalıya dair məqaləsinin dərc edildiyini diqqətə çatdırmış (https://ava.md/2021/02/25/pomnit-dobivat-sya-spravedlivosti-ne-mstit/), gənc nəslin Xocalı soyqırımını unutmamalı olduğunu və moldova xalqının insanlıq əleyhinə törədilən cinayətə qarşı azərbaycanlılarla həmfikir olduğunu bildirmiş, ərazi bütövlüyünü bərpa edənAzərbaycanın ötən illər ərzində istər siyasi, istərsə də sosial-iqtisadi sahələrdə uğurlu inkişafına istinad edərək ölkəmizin ermənilər tərəfindən xarabalığa çevrilmişbölgələrin sürətlə abadlaşdıracağını dilə gətirmişdir. Tarixçi, həmçinin Azərbaycanın liderinin uzaqgörən siyasəti nəticəsində işğaldan azad edilmiş rayonlarımızda müxtəlif irimiqyaslı layihələrin həyata keçirildiyini vurğulayaraq, bu ərazilərdə yaşayacaq azərbaycanlılarla yanaşı ermənilərin də rifahının yüksələcəyini bildirmişdir. Bunun oxşar münaqişələr yaşayan xalqlar üçün örnək olduğunu tədbir iştirakçılarının nəzərinə çatdırmışdır.

Tədbir çərçivəsində deputat V.Odnostalko çıxış edərəkinsan amilinin hər şeydən önəmli olduğunu diqqətə çatdırmış, Xocalı faciəsinin şəxsi maraqlar naminə siyasətdə atılan səhv addımların nəticəsi olduğunuMoldovada azərbaycan icmasının burada yaşayan digər xalqlarla birgə dinc yaşayışının örnək olduğunu vurğulamışdır.

Anım tədbirində çıxış edən yəhudiəsilli deputat N.Çurkan yəhudilərə qarşı Holokost qətliamını xatırlayaraq bir xalqa qarşı törədilmiş genosidin dəhşətlərilə tanış olduğunu bildirmiş, keçmiş nəsillərdən qalan tarixi dəlillərin gələcək nəsillərə ötürülsinin vacibliyini qeyd etmiş, ölkə daxilində birlikdə yaşayan xalqların bir-birinə hörmət etməli olduğunu, yalnız bundan sonra sülhə nail olmağın mümkünlüyünü diqqətə çatdırmışdır.

Yekun nitqi ilə çıxış edən səfir Qüdsi Osmanov tədbirdə iştirak edən qonaqlara təşəkkürünü bildirmiş, Xocalı qətliamına dair həqiqətləri iştirakçıların diqqətinə çatdırmış, bu faciənin insanlıq əleyhinə törədilmiş ən ağrılı cinayətlərdən biri olduğunu bildirmiş və ermənilərin tarix boyu Dağlıq Qarabağla bağlı apardıqları təxribatçı siyasətdən danışmışdır.

Bundan əlavə, tədbirdə Türkiyə Səfirliyinin əməkdaşı öz nitqində “iki millət, bir dövlət” şüarına istinad edərək qardaş Türkiyənin ölkəmizin hər zaman yanında olduğunuvurğulamışdır. Eyni zamanda,  MAK-ın sədri Elçin Bayramov, vətənpərvər diaspor üzvləri Maarif Rəhimov, Yasin Seyidov və Ramiz Ansarov azərbaycan, rus və rumın dillərində çıxışlar edərək Xocalı həqiqətlərini tədbir iştirakçıları ilə bölüşmüşdür.

Yekun olaraq tədbirdə Xocalıda baş verən faciənin Moldova Respublikasının parlamenti tərəfindən soyqırım olaraq tanınması üçün müvafiq müraciət ünvanlanmasına dair qərar verilmişdir.

Sonda Xocalıda və Vətən müharibəsində həlak olan şəhidlərin xatirəsinə dualar oxunmuş, faciə qurbanlarına həsr edilmiş foto-şəkillərdən ibarət güşənin önünə tədbir iştirakçıları tərəfindən gül dəstələri qoyulmuşdur.