Kəlbəcər rayon icra hakimiyyətinə xidməti avtomobilin alınması ilə bağlı tender başa çatıb. Bu rayon icra hakimiyyətinin İctimai siyasi və humanitar məsələlər şöbəsinin baş məsləhətçisi Hikmət Bağırov məlumat verib.

O, bildirib ki, xidməti maşın başçı üçün deyil, onun birinci müavini üçün alınıb: “Bu, “Azərmaş” ASC-nin istehsalı olan “Khazar Peugeot” sedan markalı avtomobildir. İcra başçısının özü isə “Toyota Avalon” markalı maşın sürür. Düzdür, həmin maşın 2008- ci ildə alınıb. İstismar müddəti 10 il olsa da, icra başçısı Aqil Məmmədov həmin maşından yenə də istifadə edəcək”.

Qeyd edək ki, bir neçə gün öncə rəsmi qəzetlərdə icra başçısı üçün avtomobil alınması ilə bağlı tender elan olunmuşdu. Həmin tenderdə “Mercedes S350” markalı avtomobilin alınması nəzərdə tutulmuşdu. İcra başçısının bu markalı avtomobil alması müzakirələrə səbəb olmuşdu.

Daha sonra İcra Hakimiyyəti dövlət büdcəsindən xidməti avtomobil alınması üçün 50-55 min manat vəsait nəzərdə tutulduğunu açıqlamış və sözügedən markalı avtomobilin deyil, işlənmişini almağı planlaşdırdıqlarını bildirmişdi.

Oxumağa dəyər:   KİV: Trampın dövründə dövlət büdcəsinin kəsiri 1 trilyon dollara çatacaq

Cəmi bir gün sonra isə, İcra Hakimiyyəti “Mercedes S350” niyyətini “Khazar Peugeot” ilə əvəzləyərək reallaşdırıb.

 

İstinadlar Qafqazinfo