Türkiyədə müstəqil kibertəhlükəsizlik təşkilatının yaradılması hökumətin gündəminə gətirilib.
Bu barədə Türkiyə XİN rəhbəri Hakan Fidan “Anadolu Agentliyi“nə müsahibəsində bildirib.
O, Livanda həyata keçirilən kiber hücumu şərh edərək, kəşfiyyat təşkilatlarının bu cür hücumlardan tez-tez istifadə etdiyini əlavə edib.
Nazir bildirib ki, ölkə prezidenti bu sahəyə məsul yeni bir təşkilatın yaradılmasını dəstəkləyib.
Bundan əlavə, Türkiyənin Kibercinayətkarlıqla Milli Mübarizə Mərkəzi (USOM) Livanda ən azı 20 nəfərin ölümünə səbəb olan portativ radiostansiyaların partlaması fonunda gücləndirilmiş iş rejiminə keçib və bu, bütün dünyada informasiya təhlükəsizliyi məsələsini gündəmə gətirib.
USOM-un strukturlarından biri olan Türkiyənin İnformasiya Texnologiyaları və Kommunikasiya Qurumu (BTQ) xəbər verir ki, ölkədə kibertəhlükəsizliyin təmin edilməsi prosesinə 2300-dək mütəxəssis qrupu cəlb olunur.
USOM-un imkanları ona kibertəhlükəsizlik problemləri üçün 17 milyona qədər IP ünvanını bütün sutka ərzində skan etməyə imkan verir. USOM Türkiyənin internet resurslarına hər gün yüzlərlə böyük hücumun qarşısını alır, həmçinin 11 milyon zərərli resursa girişi bloklayır. Təkcə 2023-cü ildə ölkənin resurslarına 140 minə qədər böyük hücumun qarşısı alınıb.
BTQ, həmçinin USOM mütəxəssislərinin peşəkarlıq səviyyəsinin yüksəldilməsi məqsədilə vaxtaşırı keçirilən çoxsaylı təlim, yarış və kurslara diqqət çəkib.
USOM tərəfindən toplanan məlumatlar, zərurət yarandıqda, təhdidlərə qarşı mübarizəni əlaqələndirmək üçün Türkiyənin dövlət qurumlarına və beynəlxalq tərəfdaşlarına ötürülür.
Buna paralel olaraq, Türkiyənin təhlükəsizliyi üçün strateji əhəmiyyət kəsb edən yeni yerli kibermüdafiə proqramları hazırlanır və həyata keçirilir.
