İqbal Məmmədov fotolarla şantaj edildiklərini təsdiqlədi – VİDEO

Milli Məclisin deputatı İqbal Məmmədov oğlunun üzləşdiyi şantaj hadisəsi ilə bağlı açıqlama verib.
Laf TV-yə telefon bağlantısı ilə qoşulan İ.Məmmədov hadisənin 2020-ci ilin yanvar ayında baş verdiyini deyib.
O, deputatlığa namizəd olduğu dövrdə oğlunun ona məxsus olduğu iddia edilən görüntülərlə şantaj edildiyin deyib: “Oğlum mənə dedi ki, ona zənglər edirlər, şantaj edirlər. Mən dedim ki, gəl həmin adamları hüquq-mühafizə orqanlarına verək. Çünki belə bir şey bizim nəslə yaraşmayan bir şeydir. Dərhal hüquq-mühafizə orqanlarına müraciət etdik. Həmin pulu da hüquq-mühafizə orqanlarının istəyi ilə deyilən karta yüklədik ki, onlar izi tapa bilsinlər. 3-4 ay ərzində həmin adam tapıldı, araşdırma aparıldı və işi məhkəməyə göndərdilər. Məhkəmə də ona iş kəsib”.
İ.Məmmədov əlavə edib ki, həmin şəxs qadın deyil, kişidir: “Mən əvvəllər uzun müddət biznes fəaliyyəti ilə məşğul olmuşam. 2010-cu ildə millət vəkili seçiləndən sonra şirkətlərimi ailəmə və qardaşıma dövr etmişəm. Bu şəxs də həmin şirkətlərin birində işləyib, daha əvvəl isə hansısa reket saytlardan birində çalışıb. Qardaşıma məxsus olan şirkətdə işlədiyi vaxt o, işdən qovulub. Bu səbəbdən də belə bir şantaja əl atıb”.
Millət vəkili şantaja əl atmış şəxsin əlində hər hansı ifşaedici foto və ya məlumatın olmadığını bildirib.
“Qafqazinfo”nun apardığı dəqiqləşdirmələrdən sonra məlum olub ki, millət vəkilinin oğlunu şantaj etdiyinə görə həbs edilən şəxs 1992-ci il tarixdə Bakıda anadan olmuş, ailəli, ali təhsilli Xəzər rayonu, Şüvəlan qəsəbəsində yaşayan R.Ə.Quliyevdir. O, 1984-cü il təvəllüdlü Nəzrin Məmmədli adı ilə saxta profillər açaraq İqbal Məmmədovun oğlu Mirhəmin Nərimanlını şantaj edib.
Qeyd edək ki, bu gün “Qafqazinfo”da yayımlanan xəbərdə də Xəzər Rayon Məhkəməsinin hökmü ilə R.Ə.Quliyevin 2022-ci ildə həbs olunduğu, daha sonra şərti cəza ilə azadlığa buraxıldığı qeyd olunmuşdu. Bu ilin may ayının 18-də isə Bakı Apellyasiya Məhkəməsinin qərarı ilə o, yenidən məhkəmə zalındaca həbs edilib.
Belə ki, apellyasiya instansiyası təqsirləndirilən şəxs barəsindəki 3 il həbs hökmünü bərpa edib. R.Ə.Quliyevin 2022-ci ildə bu cinayət işi üzrə həbsdə saxlanıldığı 1 ay 28 gün cəzasından çıxılıb.
Oksfordda güclü partlayış olub – VİDEO

Böyük Britaniyanın Oksfordşir qraflığının paytaxtı Oksfordda güclü partlayış olub.
Insident “Severn Trent Water” müəssisəsində baş verib.
Böyük yanğına ildırımın tullantı emalı zavodundakı qaz konteynerlərinə vurması səbəb olub.
Hadisə yerinə təcili yardım xidmətləri cəlb edilib. İlkin məlumata görə, hadisədə zərər çəkən yoxdur.
Salatın Əsgərovanın şəhid edildiyi kənddən görüntülər – Video

Şuşa rayonunun Böyük Qaladərəsi kəndinin videogörüntüləri yayılıb.
“Qafqazinfo” həmin görüntüləri təqdim edir.
Qeyd edək ki, Azərbaycanın ilk şəhid qadın jurnalisti olan Salatın Əsgərova 1991-ci il yanvarın 9-da Laçından Şuşaya yollanarkən məhz bu kənd yaxınlığında Ermənistan silahlı qüvvələri tərəfindən amansızcasına qətlə yetirilib.
Qarabağda mühəndis işləri aparılır – Video

“Azərbaycan Ordusunun mühəndis-istehkam bölmələri tərəfindən Qarabağ bölgəsinin mina və partlamamış döyüş sursatlarından təmizlənməsi üzrə tədbirlər həyata keçirilir”.
Bu Müdafiə Nazirliyindən (MN) məlumat verilib.
“Lokal xarakterli antiterror tədbirləri başa çatdıqdan sonra Azərbaycan Ordusunun mühəndis-istehkam bölmələri tərəfindən cari ilin sentyabrın 21-dən oktyabrın 2-dək bölgədə 18 ədəd piyada əleyhinə mina, 105 ədəd tank əleyhinə mina aşkar edilərək təhlükəsizlik qaydalarına riayət olunmaqla zərərsizləşdirilib.
Mühəndis təminatı üzrə görülən tədbirlərdə əsas səylər ərazilərin minalardan təmizlənməsinə, eləcə də yeni təminat yollarının çəkilməsinə yönəldilir. Qeyd olunan ərazilərdə mühəndis təminatı üzrə zəruri tədbirlər plana uyğun davam etdirilir”, – MN-in məlumatında bildirilib.
FHN metroda təlim keçirdi – Video

Fövqəladə Hallar Nazirliyi və “Bakı Metropoliteni” QSC-nin birgə təşkilatçılığı ilə metronun “Xətai” stansiyasında təlim keçirilib.
Nazirlikdən verilən məlumata görə, təlimin mövzusu “Bakı metropolitenində baş verə biləcək fövqəladə hadisələr zamanı birgə fəaliyyətin təşkili” olub.
Təlimə rəhbərlik FHN-in Baş əməliyyat idarəsi tərəfindən həyata keçirilib.
Əvvəlcə, FHN-in “112” qaynar telefon xəttinə metronun “Xətai” stansiyasının platformaaltı kabel kollektorunda şərti qısaqapanma baş verməsi barədə məlumat daxil olub və dərhal Nazirliyin Dövlət Yanğından Mühafizə, Dövlət Yanğın Nəzarəti xidmətləri və Bakı Regional Mərkəzinin müvafiq qüvvələri hadisə yerinə cəlb olunub.
Şərti hadisə ilə bağlı Metropoliten əməkdaşları tərəfindən ilk olaraq stansiyanın bağlanması, tuneldə işçi işıqların yandırılması, təmas relslərindən gərginliyin kəsilməsi üçün qısaqapayıcıların pozulması, keçid qapılarının açılması işləri həyata keçirilib.
FHN-in mobil yanğın-xilasetmə qrupları tərəfindən fərdi mühafizə vasitələrindən istifadə edilməklə operativ olaraq kəşfiyyat və əməliyyat şəraitinin qiymətləndirilməsi işləri aparılıb, qısa müddətdə şərti yanğın söndürülüb, xilasetmə vasitələri tətbiq edilməklə “zərərçəkmişlər” təxliyə olunaraq onlara “ilkin yardım göstərilib”.
Uğurla keçən təlimdən sonra nəticələr müzakirə olunub, FHN və Metropolitenin əməkdaşları arasında obyektdə baş verə biləcək fövqəladə hallarda xilasetmə işlərinin aparılması, zərərçəkmişlərə ilkin yardımın göstərilməsi və təxliyə zamanı təhlükəsizlik qaydaları ilə bağlı fikir mübadiləsi aparılıb.
Təlimə FHN-in ümumilikdə 5 ədəd texnikası və 41 nəfərdən ibarət şəxsi heyəti cəlb olunub.
Başını Şuşa tut… – Tarixi görüntülər – VİDEO

“Real TV”nin rəhbəri Mir Şahin Ağayevin “Bizim yeni era” teleoçerki yayımlanıb.
Müəllif layihədə artıq başa çatan Qarabağ münaqişəsindən, 90-cı illərin əvvəllərində və ondan öncəki dövrdə Azərbaycan qarşı aparılan məkirli siyasətdən, ölkəmizin sonda ərazi bütövlüyünü və suverenliyini bərpa etməsindən danışıb.
Eyni zamanda, “Bizim yeni era” teleoçerkində tarixi kadrlar da öz əksini tapıb.
Prezident Bakı Beynəlxalq Astronavtika Konqresində çıxış edir – Canlı – VİDEO

Xəbər verdiyimiz kimi, bu gün Bakıda Azərbaycanın Kosmik Agentliyinin (“Azərkomos”) və Beynəlxalq Astronavtika Federasiyasının tətəfdaşlığı ilə 74-cü Bakı Beynəlxalq Astronavtika Konqresi keçirilir.
Prezident İlham Əliyev Konqresdə çıxış edir.
Son bir həftədə… – Video

Azərbaycan Müdafiə Nazirliyi həftəlik icmalını (24.09.2023 – 01.10.2023) açıqlayıb.
“Qafqazinfo” icmalın videosunu təqdim edir:
Bu silahlar Ağdərədə müsadirə edildi – Video

Qarabağ bölgəsində Ermənistan silahlı qüvvələrinin birləşmələri və qeyri-qanuni erməni silahlı dəstələrinə məxsus silah-sursat və müxtəlif təyinatlı döyüş texnikasının müsadirə edilməsi üzrə tədbirlər davam etdirilir.
Müdafiə Nazirliyindən verilən məlumata görə, Ağdərə ərazisindəki mülki infrastruktur obyektlərinə baxış zamanı növbəti silah-sursat anbarı müəyyən edilib.
Anbardan aşkar edilmiş xeyli sayda patron, əl qumbaraları, minaatan, müxtəlif çaplı ağır artilleriya və tank mərmiləri, tankəleyhinə raket komplekslərinin idarəolunan raketləri və digər döyüş sursatları, həmçinin müxtəlif təyinatlı döyüş texnikası müsadirə edilib.
Bundan başqa qeyd olunan istiqamətdəki dayaq məntəqəsindən də silah və sursatla dolu yeşiklər aşkar edilərək götürülüb.
Salvador Dalinin Heydər Əliyev Mərkəzindəki sərgisini 10 mindən çox ziyarətçi izləyib – VİDEO

Heydər Əliyev Mərkəzində aprelin 27-dən açılan “Salvador Dali. Sürrealizm mənəm” sərgisini indiyədək 10 mindən çox ziyarətçi izləyib.
Salvador Dalinin Azərbaycanda ilk dəfə təqdim olunan əsərləri sırasında rəssamın qrafik əsərləri, şüşədən və bürüncdən hazırlanan heykəltəraşlıq nümunələri yer alıb.
Oktyabrın 8-dək davam edəcək sərginin təşkil olunduğu məkanda ötən həftəsonu “Salvador Dalinin ilham pərisi” adlı rəqs tamaşasının premyerası keçirilib.
Tamaşa “Nine Senses” İncəsənət Mərkəzinin təşkilatçılığı ilə Azərbaycanda ilk dəfə təqdim olunur.
Dram janrında hazırlanan tamaşa müasir balet, qrafik texnologiya və musiqini özündə birləşdirərək sürrealizmin dahisi sayılan Salvador Dalinin əsərləri fonunda təqdim edilir. Əsər həm də Dalinin həyat yoldaşı Qalaya sonsuz sevgisini əks etdirir.
Təqdimatdan əvvəl tamaşaçılar məşhur ispaniyalı rəssam Salvador Dalinin əsərlərindən ibarət “Sürrealizm mənəm” sərgisi ilə tanış olublar.
Ziyarətçi Sayalı Baharın sözlərinə görə, Salvador Dali çox epataj sənətkardır: “20-ci əsrdə çox böyük inqilab edib. Heydər Əliyev Mərkəzində belə bir sərgi və tamaşada iştirak etdiyimə görə çox şadam”.
Rusiyanın Sankt-Peterburq şəhərindən olan ziyarətçi Leonid Yakovlev tədbiri çox bəyəndiyini deyib: “Çox qəribədir, amma Dalinin bəzi əsərlərində Azərbayacan incəsənəti ilə oxşarlıqlar sezdim. Məsələn, şəkillərdə Qobustan təsvirlərini gördüm. Sərginin keçirilməsi çox yaxşı oldu. Burada orijinal əsərlərə baxmaq mümkündür”.
Daha sonra tamaşa nümayiş olunub.
“Salvador Dalinin ilham pərisi” tamaşasının ideya müəllifi və xoreoqrafı Anna Verdedir.
Unikal layihədə Moskvada fəaliyyət göstərən teatrların aktyorları yer alıb: Eduard Axmetşin, Regina Axmetşina, Adeliya Qalimova, Yuliya Perepelitsa, Artyom Noçvin.
“Salvador Dali” obrazının ifaçısı Eduard Axmetşinin sözlərinə görə, tamaşanın hazırlıq prosesi çox çəkib: “Bu obrazı oynamaq üçün çox sayda sənədli filmə baxmışam. Təkcə çıxıb oynamaq üçün deyil, həm də daxili dünyasını yaşamaq və tanaşaçıya çatdırmaq üçün”.
Digər ziyarətçi Aytən Fətəliyeva tamaşanı çox bəyəndiyini bildirib: “Həqiqətən də əsərin içinə girdim, canlı izlədim. Emosiyalar çox canlı idi, aktyorlar peşəkar idi. İnşallah belə tədbirlər çox olar. Heydər Əliyev Mərkəzinin sərgilərini hər zaman bəyənirəm, bu da onlardan biri idi”.
Hüseyn Məmmədsalahov
Video: Pərvin Zeynal
Xocavənddə müsadirə edilən artilleriya qurğularının videogörüntüləri yayılıb

Azərbaycan Müdafiə Nazirliyi Xocavənd rayonu ərazisində müsadirə edilən artilleriya quruğularının videogörüntülərini yayıb.
“Report” həmin görüntüləri təqdim edir:
“Mən sənsiz ölmədim, məni bağışla…” – Qənirə Paşayevanın bacısı

Millət vəkili Qənirə Paşayevanın vəfatı ilə bağlı bacısı Kəmalə Paşayeva sosial media hesabında paylaşım edib.
O, deputatla fotosunu Ramiz Rövşənin “Ayrılıq” şeiri ilə ifadə paylaşıb:
“Mən elə bilirdim, sənsiz ölərəm,
Mən sənsiz ölmədim, məni bağışla!
“Ölmədim” deyirəm, nə bilim axı, –
Bəlkə də, mən sənsiz ölmüşəm elə,
Qəbirsiz-kəfənsiz ölmüşəm elə”.
Qeyd edək ki, Q. Paşayeva sentabrın 28-i axşam saatlarında 48 yaşında Mərkəzi Klinikada vəfat edib.
Qarabağda ermənilərin döyüş mövqeləri və dayaq məntəqələri ləğv edilir – VİDEO

Lokal xarakterli antiterror tədbirləri nəticəsində Ermənistan silahlı qüvvələrinin birləşmələri tərəfindən tərk edilmiş döyüş mövqeləri və dayaq məntəqələri ləğv edilir, ərazidə kommunikasiya xətləri bərpa olunur.
Bu barədə Müdafiə Nazirliyindən məlumat verilib.
Sentyabrın 29-da Tərtər və Ağdərə yaşayış məntəqələrini birləşdirən yol üzərindəki döyüş mövqeyi ləğv edilərək nəqliyyat vasitələrinin təhlükəsiz hərəkəti təmin edilib.
Şuşa-Xankəndi yolunda tərk edilmiş döyüş mövqelərinin kadrları yayılıb – VİDEO

Azərbaycan Müdafiə Nazirliyi Şuşa-Xankəndi yolunda tərk edilmiş döyüş mövqelərinin kadrlarını yayıb.
Qərbi Azərbaycan Xronikası: “Ermənilərdən qorumaq üçün qızımla oğlumu kartofun arasında gizlətdim” – VİDEO

Bu gün Baku TV-də Qərbi Azərbaycan Xronikası layihəsi çərçivəsində jurnalist Əsgər İbrahimovun müəllifi olduğu “Həyat Hekayəsi” verilişinin növbəti buraxılışı efirə gedib.
“Gecə evimizi ermənilər daşa basırdılar” adlı veriliş Pəmbək mahalının Böyük Qarakilsə rayonunun (keçmiş Kirovakan, indiki Vanadzor) Lermontov (Antaraşen) kəndində anadan olmuş Gülsəfa Rüstəmovanın həyat hekayəsinə həsr olunub.
O, uşaqlıq, orta məktəb, gənclik illərinin gözəl keçdiyini, kənddə əsasən ruslar, 15 ailə azərbaycanlı, 6-7 erməni ailəsi var idi:
“Biz erməni, rus, bilmirdik. Bizə ermənilər türk deyərdi, ruslar tatar deyərdi. Öz dilimizi bilirdik, bayramlarımızı keçirərdik, yumurta boyayardıq, qapı pusardıq”.
Onun sözlərinə görə, kənddən çıxarkən çox çətinliklərlə üzləşiblər:
“Gecə ikən kinoya baxırdıq. Ermənilər dedilər ki, çıxın, sizi burada məhv edəcəklər. Birinci Qazaxa gəldik, 5-6 gün qaldıqdan sonra bizi geri qaytardılar. Ondan sonra ara qızışdı, qaçaqaçdıq düşüdü. Biz tankla çıxdıq. Biz oradan çıxanda mənim 29 yaşım var idi. Ailədən 2 nəfər bir çıxdıq, 4 nəfər də bir çıxdıq. Anam iki uşağımı bir götürdü, kiçik oğlum əlimdə 1 yaş 7 aylıq idi. Gecə evimizi daşa basırdılar. Böyük qızımla kiçik oğlumu kartofun arasında gizlətmişdim. Kartof ləkdə çiçək açmışdı, arasında gizlədirdim. Gündüz olanda bizə çox dəymirdilər, axşamlar bizi çox qorxudurdular. Vanadzor kəndi var idi, orada yaxın adamımızdan öldürdülər, əşyalarını, özlərini yandırdılar. Oradan qaçıb gəlib bizim rus kəndinə dolmuşdular. Qaynatamgilin evini yandırdılar, özünü döydülər. Elə yarımcan Gəncəyə gətirdilər, elə orada da rəhmətə getdi. 1918-ci ildə nənəmin birinci yoldaşını da, bir dənə də qızını ermənilər öldürmüşdü”.
G.Rüstəmova doğma yurda qayıtmağı çox istədiyini deyib:
“Bu, hər zaman arzumuz olub. Sakitçilik, mehribançılıq olsa, qayıtsaq, daha yaxşı olar. İlk gedişimdə birinci qəbiristanlığa gedərdim, ondan sonra da evimə dəyərdim. Hər bir yeri, cığırı tanıyıram. Heç bir cığırımızı unutmamışam. Məzarlarımız, rəhmətə gedənlərimiz orada qaldı. O heç vaxt yaddan çıxmaz. Həmişə öz evimizi, həyətimızı, kəndimizi, dağlarımızı yuxumda görürəm. İnşallah, qayıdacağıq. Buna əminik və böyük həvəslə gedəcəyik”.
Xatırladaq ki, Qərbi Azərbaycan Xronikası layihəsinin məqsədi tarixi qədim torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri – qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi “XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin”, – fikrini əsas tutaraq Qərbi Azərbaycan İcmasının hazırladığı Qayıdış Konsepsiyasında irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
Veriliş sentyabrın 29-da saat 19:30-da Baku Tv-nin efirində və Youtube kanalında yayımlanıb.
Prezidentin Zəngilandakı çıxışının – Videosu

Xəbər verdiyimiz kimi, bu gün BMT-nin Məskunlaşma Proqramının (UN-HABITAT) və Azərbaycan Respublikasının Dövlət Şəhərsalma və Arxitektura Komitəsinin əməkdaşlığı ilə keçirilən “Şəhərsalma Həftəsi 2023” tədbirləri çərçivəsində Zəngilanda “Davamlı şəhərlər iqtisadi inkişafın hərəkətverici və bərabərsizliklərlə mübarizə aparan qüvvəsi kimi” mövzusunda 2-ci Milli Şəhərsalma Forumunun açılış mərasimi keçirilib.
Azərbaycan Prezidenti İlham Əliyev tədbirdə çıxış edib.
Ölkə başçısının Forumdakı çıxışının videosunu təqdim edirik:
Binəqədidə içməli sudan qanunsuz istifadənin qarşısı alındı – Video

Dövlət Su Ehtiyatları Agentliyi içməli sudan qanunsuz istifadənin aşkarlanması, su itkilərinin minimuma endirilməsi və israfçılığın qarşısının alınması məqsədilə nəzarət tədbirlərini davam etdirir.
Nəzarət tədbirləri zamanı Biləcəri qəsəbəsi, DSK yolunda yerləşən və bir sahibkara məxsus un məmulatları təndir, “Ekonom” market, təkər təmiri, əlvan metal qəbulu, heyvan saxlama məntəqələrində sudan qanunsuz istifadə halları aşkarlanıb. Belə ki, bu obyektlərin sahibi texniki şərt almadan, müqavilə bağlamadan qeyri-qanuni şəkildə yaxınlıqdan keçən 1400 mm diametrli magistral su kəmərinə qoşulma verərək içməli sudan qanunsuz şəkildə istifadə edib. Nəzarət tədbirləri zamanı məlum olub ki, həmin obyektlərin arxasında yerləşən 13 həyət evi üçün həmin magistral su kəmərindən özbaşına birləşmə verilib.
8-ci mikrorayon yaşayış massivi, Süleyman Sani Axundov 5B ünvanında yerləşən “Kababçı” və “Çayxana”da sudan qeyri-qanuni istifadə halı aşkarlanıb. Həyata keçirilən araşdırma zamanı, Seyid Cəfər Pişəvəri küçəsi 1 ünvanında yerləşən hovuz avadanlıqlarının satışı məntəqəsində sudan qanunsuz istifadə halı aşkar edilib. Obyekt sahibi sayğacdankənar xətt çəkərək içməli sudan qeyri-qanuni istifadəni davam etdirib. Nəzarət tədbirləri zamanı aşkar edilən bütün qeyri-qanuni xətt və birləşmələr kəsilərək ləğv edilib.
Dövlət Su Ehtiyatları Agentliyi olaraq bir daha vətəndaşların diqqətinə çatdırırıq ki, içməli sudan qeyri-qanuni və sayğacdankənar istifadə şəbəkələrdə hidravliki rejimlərin pozulmasına, ciddi su itkilərinə, həmin ərazilərdə yaşayan digər abonentlərin su təchizatının pisləşməsinə səbəb olur. Belə qanunsuz halların qarşısını almaq üçün tədbirlər mütəmadi davam etdiriləcək, özbaşına çəkilmiş və sayğacdankənar xətlər ləğv olunacaq, bu əməllərə yol verən fiziki və hüquqi şəxslərə qarşı sərt nəzarət tədbirlərinin görülməsi üçün hüquq-mühafizə orqanlarına müraciət olunacaq.
Qeyd edək ki, 2023-cü ilin yanvar-avqust aylarında Azərbaycan Dövlət Su Ehtiyatları Agentliyi “Azərsu” Açıq Səhmdar Cəmiyyəti üzrə 12219, Binəqədi rayonunda isə 2337 sudan qanunsuz istifadə halları aşkarlanıb, 100-dən artıq fakt araşdırılması üçün hüquq-mühafizə orqanlarına təqdim olunub.
Həmçinin baxın
Prezident Bakı Beynəlxalq Astronavtika Konqresində çıxış edir – Canlı – VİDEO
Salvador Dalinin Heydər Əliyev Mərkəzindəki sərgisini 10 mindən çox ziyarətçi izləyib – VİDEO
Xocavənddə müsadirə edilən artilleriya qurğularının videogörüntüləri yayılıb
Qarabağda ermənilərin döyüş mövqeləri və dayaq məntəqələri ləğv edilir – VİDEO
Şuşa-Xankəndi yolunda tərk edilmiş döyüş mövqelərinin kadrları yayılıb – VİDEO
Qərbi Azərbaycan Xronikası: “Ermənilərdən qorumaq üçün qızımla oğlumu kartofun arasında gizlətdim” – VİDEO
Azad olunmuş ərazilərdə mühəndis təminatı üzrə tədbirlər davam edir – VİDEO
Qərbi Azərbaycan Xronikası: Ermənistan Qərbi Azərbaycanı ərazi olaraq tanıyacaq – VİDEO
Azərbaycanın Qarabağ bölgəsində mina-tələlər zərərsizləşdirilir – Fotolar+Video
Müdafiə Nazirliyinin rəhbər heyəti inşası davam etdirilən Zəfər parkında olub – VİDEO
Bizi Facebook-da izləyirsiniz?
Bağla