“Sinaloa” narkokartelinin keçmiş başçısı, “El Chapo” (“Cücə) ləqəbli meksikalı narkobaron Xoakin Qusman, vaxtından əvvəl buraxılma hüququ olmadan, 30 il müddətinə azadlıqdan məhrum edilib.Bu barədə “Reuters” agentliyi xəbər verib.

Nyu-Yorkun Bruklin Federal Məhkəməsində keçirilən proses zamanı hakim Brayan Koqan “El Chapo”dan 12,6 milyard ABŞ dolları alınması barədə də qərar verib. Bildirilir ki, narkobaron məhz bu qədər pulu narkoticarət vasitəsi ilə qazanıb.

Xatırladaq ki, X. Qusman 2001-ci ildə həbsxanadan qaçdıqdan sonra 2014-cü ildə yenidən dəmir barmaqlılar arxasına salınıb. Lakin, bir neçə ay ərzində 14 km-lik tunel qazaraq yenidən qaçmağı bacarıb. Üçüncü dəfə isə 2016-cı il yanvarın 6-da saxlanılıb və 2017-ci il 19 yanvarda ABŞ-a ekstradisiya edilib. Məhkəmə prosesləri 2018-ci il noyabrın 13-də başlayıb. 2019-cu ilin fevralında o, ittiham olunan bütün maddələrlə günahkar bilinib.

Rusiyanın paytaxtı Moskva şəhərində retro tramvayların paradı keçirilib.Parad 13 iyul – Moskva nəqliyyatı günü münasibəti ilə təşkil olunub.

Həmin gün minlərlə insan onlar üçün ayrılmış 19 retro tramvaydan istifadə etmək şansı əldə edib. Onlardan ən köhnəsi – 1872-ci il iyulun 7-də marşruta çıxan konkadır.

Qeyd edək ki, tramvay paradı 2014-cü ildən keçirilir.

İngiltərənin Kornuoll qraflığının sahillərində nəhəng meduza tapılıb.

Sosial şəbəkədə paylaşılan fotoda “Lizzie Daly Wildlife TV” internet-kanalının aparıcısı, bioloq Lizzi Deyli və həmin meduza yer alıb. Deylinin sözlərinə görə, dəniz varlığı onunla eyni boydadır.

Meduzanın videogörüntülərini “BBC News” telekanalı yayımlayıb. 

Dişi şir ac balalarına görə filə hücum edib.

Iki vəhşi heyvanın mübarizəsi Cənubi Afrikanın Krüqer Milli parkında qeydə alınıb.  

Hadisə şahidlərinin sözlərinə görə, balaları ilə vaxt keçirən dişi şir qəfl aktiv hərəkət etməyə və onlarla bərabər kolluqların arasından keçməyə başlayıb. Bir dəqiqədən sonra filin qışqırığı eşidilib.

Kadrlardan göründüyü kimi, caynaqları ilə filin üzündən yapışan şir onunla bir xeyli mübarizə aparıb. Fili yerə yıxmaq istəyən şir istəyinə çata bilməyib.

Avstraliyada “dəniz şeytanı” kimi tanınan nəhəng skat üzgüçülüklə məşğul olan idmançılara tərəf üzərək onlardan kömək istəyib.Baş verənlərin videosunu “NBC News” telekanalı yayımlayıb.  

Heyvanın insanlara yaxınlaşmasına səbəb gözünün üstündə ilişib qalmış balıqçı qarmağı olub. İdmançılardan biri daha əvvəl də bu skatı gördüyünü deyib, amma o heç vaxt onlara bu qədər yaxın üzməyib. Kişi ehtimal edib ki, skat onu tanıyıb və kömək istəyib. Heyvan gözündəki qarmaqdan kor ola və ya infeksiyadan ölə bilərdi.

İdmançının hava ehtiyatı az olmasına baxmayaraq, o bir neçə cəhddən sonra qarmağı balığın gözündən çıxara bilib. Bundan sonra skat, təşəkkür əlaməti olaraq, hələ bir neçə dəqiqə də həyatını xilas edənlərin yanından aralanmayıb.

Rusiyanın Yekaterinburq şəhər sakini Karolina Çörnıx paraşütlə tullanan ən gənc ekstremalçı kimi Rusiyanın Rekordlar Kitabına düşüb.10 yaşlı qız təlimatçı ilə bərabər 2,5 min metr hündürlükdən tullanıb.

“Mənə ümumiyyətlə qorxulu deyildi! Üçə qədər sayıb tullanmaq lazım idi, amma biz artıq “iki” deyəndə tullandıq! Mən hətta gülürdüm, bizi kamera çəkirdi. İndi 4000 metrdən tullanmaq istəyirəm”, – deyə gənc rekordçu bildirib.

Qızın anası Yelenanın sözlərinə görə, paraşütlə tullanma Karolinan arzusu idi. Ana qeyd edib ki, qızı indi Elbrus zirvəsini (5642 m) fəth etmək istəyir və artıq məşqlərə başlayıb.