Baş Narkotiklərlə Mübarizə İdarəsi tərəfindən bu ilin ilk 10 günü ərzində 127 kiloqram narkotik dövriyyədən çıxarılıb, 31 nəfər həbs edilib.

DİN Mətbuat xidmətindən verilən məlumata görə, ilk tədbir zamanı Beyləqan rayon sakinləri əvvəllər məhkum olunmuş Ramil Həsənov, Müzəffər Rüstəmzadə və Zaur İmanov saxlanılıblar.

Bu şəxslərin üzərindən və Füzuli rayonunun Böyük Bəhmənli kəndi ərazisində gizlətdikləri yerdən ölkəyə qaçaqmalçılıq yolu ilə gətirilən 2 ədəd polietilen torbalarda qablaşdırılan 44 kiloqram, o cümlədən 31 kiloqram heroin, 10 kiloqram tiryək, 3 kiloqram marixuana və 1480 ədəd satışı qadağan edilən psixotrop tərkibli preqabalin həbi aşkar olunub.

Sabirabad rayonunda saxlanılan Hidayət Məmmədova külli miqdarda narkotik maddələr göndərən Şirvan şəhər sakini Orxan Nağıyev Binəqədi rayonunda tutulub. Bu şəxslərdən və Orxan Nağıyevin avtomobilindən ümumilikdə 35 kiloqram, o cümlədən 21 kiloqram heroin, 10 kiloqram metamfetamin, 4 kiloqram marixuana və elektron tərəzi aşkar olunub.

Röyal Rəhimov və əvvəllər məhkum olunmuş Surac Kərimli Qaradağ rayonu ərazisində saxlanılıblar. Onların üzərindən və Röyal Rəhimovun avtomobilindən 22 kiloqram, o cümlədən 12 kiloqram heroin və 10 kiloqramdan artıq metamfetamin aşkar olunub.

Adları sadalanan 7 nəfər beynəlxalq narkoşəbəkənin üzvləri olublar. Onlar qaçaqmalçılıq yolu ilə Asiya ölkələrindən göndərilən külli miqdarda narkotik vasitələri qəbul edərək ölkə ərazisində satışını təşkil etməyə çalışıblar.

Baş İdarənin paytaxt, eləcə də Abşeron rayonunda keçirdikləri növbəti əməliyyatlar zamanı narkotik vasitələrin satışı ilə məşğul olan daha 16 nəfər saxlanılıb. Bu şəxslərdən ümumilikdə 19 kiloqram heroin, metamfetamin, elektron tərəzilər, narkotiklərin onlayn satışı zamanı istifadə etdikləri plastik kartlar, ekstazi və metadon həbləri aşkar edilib.

Lənkəran şəhəri və Astara rayonunda saxlanılan 8 nəfərdən 7 kiloqramdan artıq narkotik vasitə və psixotrop maddə aşkar olunub.

Faktlarla bağlı Cinayət Məcəlləsinin müvafiq maddələri ilə cinayət işləri başlanılıb zəruri istintaq-əməliyyat tədbirləri davam etdirilir.

Bakı Nəqliyyat Agentliyi (BNA) paytaxt küçələrində parklanmanın idarə edilməsi məqsədilə pilot layihənin icrasına start verib.

Ilkin mərhələdə layihənin əhatə etdiyi Bəsti Bağırova, Məhəmməd Naxçıvani və onlarla kəsişən küçələrdə yenidənqurma işləri həyata keçirilməkdədir.

Parklanma yerlərinin təşkili məqsədilə layihələndirilən ərazidə həm də müasir şəhərsalma qaydalarına uyğun olaraq piyadayönümlülüyün artırılması prinsipləri əsas götürülüb.

Yeni layihə əsasında uzunluğu 450 metr olan bu küçənin ideal səviyyəyə gətirilməsi üçün 6 yerdə eynisəviyyəli piyada keçidi təşkil ediləcək. Yaşayış binalarından başqa 1 xəstəxana, 1 kollec və 1 bağçanın da yerləşdiyi bu küçədə nəqliyyat axınının intensivliyi nəzərə alınmaqla 138 parklanma yeri təşkil ediləcək, parklanmanın idarə edilməsində müasir texnologiyalar tətbiq ediləcək. İcrası davam edən layihə çərçivəsində həm də digər kommunikasiya işləri görülür ki, bu da işə əsaslı yanaşmanın təzahürüdür.

“Küçədə hazırda tikinti-quruculuq işlərinin davam etməsini nəzərə alaraq sürücü və piyadalardan bu yolda daha diqqətli olmalarını və ərazidəki müvəqqəti çətinliyi anlayışla qarşılamalarını xahiş edirik. İşlərin 3 ay ərzində tamamlanması planlaşdırılır”, – deyə BNA-dan bildirilib.

Xəbər verdiyimiz kimi, bu gün Azərbaycan Prezidenti İlham Əliyev Hacı Zeynalabdin Tağıyevin Bakıda ucaldılan abidəsinin açılışında iştirak edib.

Dövlət başçısı açılışdan sonra çıxış edib. Prezident çıxışını Filarmoniya bağında edib. İlham Əliyev bu addımını belə izah edib:

“Bir neçə dəqiqə bundan əvvəl Zeynalabdin Tağıyevin abidəsinin açılışını qeyd etdik. Abidə metronun girişinə yaxın olduğuna görə insanlara problem yaratmamaq üçün mən əziz xalqımı bu münasibətlə buradan təbrik edirəm”.

Bir neçə müddətdir ki, ölkə gündəmində Vətən müharibəsindən sonra hələ də bəzi şəxslərin hərbi geyimdən istifadə etməsi ilə bağlı məsələ müzakirələrə səbəb olub.

Sözügedən məsələ ilə bağlı REAL TV-nin efirində yayımlanan süjetdə qeyd edilir ki, müharibənin başa çatmasından 1 ildən artıq vaxt keçməsinə baxmayaraq, yenə də regionlarda və Bakıda hərbi geyimli şəxslərə rast gəlinir. Belə ki, hərbi xidmətdən tərxis olunan hərbi qulluqçularla yanaşı, ümumiyyətlə xidmətdə olmayanların hərbi formada gəzməsi sanki dəb halını alıb. Qanun isə bütün hallarda hərbçi olmayan şəxslərin hərbi forma geyinməsini qadağan edir. Azərbaycanda hərbi geyim formasının daşınması Prezidentin 2021-ci il 25 iyun tarixli fərmanı ilə tənzimlənir. Həmçinin İnzibati Xətalar Məcəlləsinin 534-cü maddəsinə əsasən  hərbi geyim formasını qanunsuz daşımağa görə cərimə də nəzərdə tutulub və bu halda geyim müsadirə olunur. 

Hərbi ekspert Ədalət Verdiyev qeyd edib ki, qanunvericilik hərbi xidmətdən tərxis olunan hərbi xidmət qulluqçularına həmin geyimlərin daşınmasına görə 300 manatdan 500 manata qədər cərimə nəzərdə tutur: “Hesab edirəm ki, bu faktların qarşısını almaq üçün həmin cərimələrin polis orqanları və hərbi polis orqanları tərəfindən tətbiq edilməsinin zamanı çatıb. Daha əvvəllər də şahidi olmuşuq ki, bir qrup insan bu hərbi geyimlərdən həm də xoşagəlməyən hallar üçün istifadə edirlər. Geyim formalarının mağazada satılmasına müəyyən məhdudiyyətlər qoyulmalıdır”.

Son günlərdə Azərbaycanda müşahidə olunan qarlı hava şəraiti Şuşada da hökm sürür.

Əvvəlki günlərdən fərqli olaraq, bu gün səhər saatlarından başlayaraq qar daha şiddətli yağıb və ətraf ağappaq olub.

Bununla bağlı “Xarıbülbül” otelinin qarşısında çəkilmiş əsrarəngiz görüntüləri təqdim edirik:

Paytaxtdan sonra ətin qiymətində olan artım dalğası bölgələrə də çatıb.

Xəzər TV fərqli rayonlardakı bazarlarda və ət satışı məntəqələrində mövcud vəziyyəti lentə alıb.

Ətin qiymətindəki bahalaşmadan həm satanlar, həm də alanlar narazıdırlar.

Tovuzun mərkəzi ticarət mərkəzindəki ət satışı bölməsində satışa çıxarılan iri və xırdabuynuzlu heyvan ətlərinin satış qiymətində artım var. Alıcılar deyirlər ki, son vaxtlar ət xeyli bahalaşıb və bu fərq bəzi hallarda dörd manata çatır.

Satıcılar qiymət artımını fərqli səbəblərlə izah edirlər. Onların sözlərinə görə, heyvan yemindəki qiymət artımı fermerlərə təsir etdiyi üçün onlar da heyvanları baha satırlar.

Bərdədə də quzu ətində bahalaşma qeydə alınıb. Satıcıların sözlərinə görə, əvvəllər 12 manata satılan quzu əti indi üç manata qədər bahalaşıb.

Bərdədə mal ətində isə qiymət artımı yoxdur. Rayonda mal ətinin qiyməti 9-10 manat arasında dəyişir. Ancaq satıcılar bazarda heyvanın diri çəkisinin bahalaşdığını deyirlər.

Qeyd edək ki, bölgələrdə ət satışındakı qiymət artımı yanvar ayından müşahidə olunur.

Ölkə ərazisində son günlər hava şəraiti kəskin pisləşib, bir sıra ərazilərdə güclü külək müşahidə olunub.

FHN-dən verilən məlumata görə, güclü küləyin təsirindən bir sıra fəsadlar meydana çıxıb.

Belə ki, güclü küləyin təsirindən Bakı şəhəri, Yasamal rayonu, Seyfəddin Dağlı küçəsində yerləşən beşmərtəbəli binanın dam örtüyündə dəmir navalçanın qoparaq asılı vəziyyətdə qalması və ətrafdakı insanlar üçün təhlükə yaratması barədə daxil olmuş məlumat əsasında Nazirliyin Xüsusi Riskli Xilasetmə Xidmətinin (XRXX) xilasediciləri hadisə yerinə cəlb olunub.

Xilasedicilər binanın dam örtüyündən qoparaq asılı vəziyyətdə qalmış uzunluğu təqribən 3 metr olan dəmir navalçanı götürüb kənarlaşdıraraq təhlükəni aradan qaldırıblar.

Bundan başqa, Bakı şəhəri, Xətai rayonunda onaltımərtəbəli binanın dam örtüyündə dəmir lövhənin, Suraxanı rayonu, Bülbülə qəsəbəsində isə beşmərtəbəli binanın fasad üzlüklərinin qoparaq ətrafdakı insanlar üçün təhlükə yaratması barədə daxil olan məlumatlara əsasən operativ olaraq cəlb edilən XRXX-nin xilsediciləri tərəfindən müvafiq təhlükəsizlik tədbirləri görülüb.

Fövqəladə Hallar Nazirliyinin “112” qaynar telefon xəttinə daxil olmuş zənglər əsasında Nazirliyin aidiyyəti qurumları tərəfindən ötən sutka ərzində 35 yanğına çıxış və 4 köməksiz vəziyyətdə qalma faktı üzrə qəza-xilasetmə əməliyyatları həyata keçirilib.

Görülmüş təcili və təxirəsalınmaz tədbirlər nəticəsində yanğınların operativ söndürülməsi, insanların həyatının xilas olunması təmin edilib. Ümumilikdə, FHN-in qüvvələri tərəfindən ötən sutka ərzində 4 nəfər xilas edilib.

Həmçinin, Xətai rayonunda bağlı qapı arxasında 1959-cu il təvəllüdlü Hüseynova Gülnarə Mirzəağa qızının meyiti aşkar edilərək aidiyyəti üzrə təhvil verilib.