“N” hərbi hissəsində 2023-cü il üçün hazırlıq planına əsasən ehtiyatda olan hərbi vəzifəlilərin iştirakı ilə keçirilən təlim toplanışı davam edir.

Müdafiə Nazirliyindən verilən məlumata görə, toplanışda hərbi vəzifəlilərin döyüş hazırlığı səviyyəsinin, bilik və bacarıqlarının artırılması məqsədilə müxtəlif tapşırıqlar yerinə yetirilib.

Əvvəlcə hərbi vəzifəlilərə təhlükəsizlik, silahların taktiki-texniki xüsusiyyətləri, natamam sökülüb-yığılma və istifadə qaydaları çatdırılıb.

Təlim sahəsində praktiki vərdişlərini təkmilləşdirən hərbi vəzifəlilər silahların döyüşə hazır vəziyyətinə gətirilməsi, atəş mövqeyinin tutulması və düzgün nişanalma qaydalarına əməl etməklə şərti düşmən hədəflərinin aşkar olunaraq məhv edilməsi üzrə qarşıya qoyulan tapşırıqları müvəffəqiyyətlə yerinə yetiriblər.

“Qarabağ Azərbaycan torpağıdır, bunun xaricində heç bir status qəbul edilməyəcək”.

Bunu Türkiyə Prezidenti Rəcəb Tayyib Ərdoğan Nyu-Yorkda BMT Baş Assambleyasının 78-ci iclasında çıxışı zamanı bildirib.

Cənubi Qafqazda sülhün, sabitliyin bərpasının əsas hədəf olduğunu bildirən Ərdoğan Türkiyənin “Bir millət, iki dövlət” prinsipinə əməl etdiyini və bundan sonra da edəcəyini bildirib.

Müdafiə Nazirliyi Qarabağda lokal antiterror tədbirlərinin davam etməsi ilə bağlı növbəti brifinq keçirib.

Brifinqdə nazirliyin Mətbuat xidmətinin rəisi polkovnik Anar Eyvazov çıxış edib.

O, düşmən sığınacaqları, texnikaları və digər infrastukturlarının məhv edilməsi barədə ictimaiyyətə geniş məlumat verib.

“Ermənistanın bütün son əməlləri, təxribatları, qanunsuz qüvvələrin Azərbaycanın Qarabağ bölgəsində cəmləşməsi hazırda Azərbaycan Silahlı Qüvvələrinin həyata keçirdiyi antiterror tədbirlərini qaçılmaz edirdi”.

Bunu “Global Media Group”un media direktoru Həmid Həmidov CBC telekanalının efirində deyib.

Onun sözlərinə görə, bütün bunlar separatizmə və Azərbaycanın suveren ərazisindəki qeyri-qanuni rejimin fəaliyyətinə tamamilə son qoymağa imkan verəcək.

“Eyni zamanda, qeyd etmək istəyirəm ki, Azərbaycan Silahlı Qüvvələrinin fəaliyyəti heç bir halda Xankəndidə və onun ətrafında yaşayan dinc əhaliyə qarşı yönəlməyib”, – H.Həmidov vurğulayıb.

Azərbaycanın mülki infrastrukturunu hədəfə alan top qurğusu məhv edilib.

Müdafiə Nazirliyi mülki infrastrukturumuzu hədəfə alan Ermənistan silahlı qüvvələrinin birləşmələrinə məxsus top qurğusunun məhv edilməsi anının görüntülərini yayıb.

Görüntüləri təqdim edirik:

Azərbaycan Ordusu Ermənistan silahlı qüvvələrinin birləşmələrinə məxsus hərbi təyinatlı radiotexniki qovşağı məhv edib.

“Report” qovşağın zərərsizləşdirilməsinin görüntülərini təqdim edir.

Ermənistan silahlı qüvvələrinin birləşmələrinə məxsus radiolokasiya stansiyası məhv edilib.

Bu barədə Müdafiə Nazirliyi məlumat yayıb.

Sentyabrın 19-u Xocavənd rayonu istiqamətində Rusiya sülhməramlı kontingentinin müvəqqəti yerləşdiyi Azərbaycan ərazisindəki Ermənistan silahlı qüvvələrinin birləşmələrinə məxsus P-18 radiolokasiya stansiyası (RLS) bölmələrimizin dəqiq atəşi ilə məhv edilib.

Otuz ildən çoxdur Azərbaycan və erməni xalqları başqalarının geosiyasi oyunlarının və manipulyasiyalarının girovuna çevrilib.

Bu barədə “Baku TV”nin erməni dilində hazırladığı süjetdə bildirilib.

Qeyd olunub ki, müharibənin ağır travmalarına baxmayaraq, hər iki xalq sülh və harmoniya şəraitində birgə yaşaya bilər. Bakının tam mərkəzində erməni kilsəsinin olduğu, ağır müharibələrə baxmayaraq, etnik ermənilərin Azərbaycanda yaşadıqları bildirilib. Xüsusi vurğulanıb ki, “bizim Qarabağı birlikdə yenidən qurmaq, onu firavan, iqtisadi cəhətdən inkişaf etmiş rayona çevirmək, ən əsası övladlarımızın, nəvələrimizin xoşbəxt gələcəyini təmin etmək üçün tarixi şansımız var”.

Eyni zamanda Qarabağda həyatın, infrastrukturun bərpasından da bəhs edilib. Separatçıların müxtəlif bəhanələrlə Laçın və Ağdam yolunun Qarabağ ermənilərinin üzünə açılmasına imkan verilməməsi və bununla da sadə insanların vəziyyətinin pisləşməsinə səbəb olan vəziyyətin yaranmasında da məhz bu insanların günahkar olduğu vurğulanıb.

İntensiv yağan yağışlar nəticəsində Astara və Lənkəran rayonlarının subasmaya məruz qalmış ərazilərində Fövqəladə Hallar Nazirliyinin (FHN) qüvvələri tərəfindən zəruri təhlükəsizlik tədbirlərinin görülməsi təmin edilib.

FHN-dən verilən məlumata görə, Astara rayonunun Ərçivan qəsəbəsi və Maşxan kəndində fərdi yaşayış evlərində köməksiz vəziyyətdə qalan ümumilikdə 38 vətəndaş xilasedicilər tərəfindən təxliyə olunub.

Su basmış yerlərdən suyun çəkilərək kənarlaşdırılması və digər təhlükəsizlik tədbirləri həyata keçirilib.

Hazırda Astara rayonu, Ərçivan qəsəbəsində fərdi yaşayış evlərinin həyətyanı sahələrindən suyun çəkilərək kənarlaşdırılması işləri davam etdirilir.

Bundan əlavə, Lənkəran rayonunda təhlükəsizliyin təmin edilməsi məqsədilə Nazirliyin əməkdaşları ərazidə xidmət aparır.