Ötən gecədən başlayaraq Bakı şəhərində güclü küləyin əsməsi bir sıra fəsadlara yol açıb.

Bununla bağlı paytaxtda insan həyatı və sağlamlığı üçün yaranmış təhlükəli hallarla bağlı Fövqəladə Hallar Nazirliyinin “112” qaynar telefon xəttinə daxil olmuş məlumatlar əsasında Nazirliyin müvafiq qəza-xilasetmə qüvvələri tərəfindən zəruri təhlükəsizlik tədbirləri görülüb.

Belə ki, Bakı şəhəri, Yasamal rayonu, İnşaatçılar prospektində yerləşən beşmərtəbəli binanın dam örtüyündə peyk antenasının qopub asılı vəziyyətdə qalaraq, düşmə təhlükəsinin yaranması barədə daxil olmuş məlumat əsasında FHN-in Xüsusi Riskli Xilasetmə Xidmətinin (XRXX) xilasedici qrupu dərhal hadisə yerinə cəlb olunub və antenanın ərazidən kənarlaşdırılması təmin olunub.

Bundan əlavə, Nərimanov rayonu, Təbriz küçəsində yerləşən beşmərtəbəli binanın dam örtüyünün qoparaq yerə tökülməsi və ətrafdakı insanlar üçün təhlükəli vəziyyətin yaranması barədə “112” qaynar telefon xəttinə məlumat daxil olub.

Hadisə ünvanına cəlb olunan FHN XRXX-nin xilasediciləri müvafiq təhlükəsizlik tədbirləri görüb və ərazini təhlükəsizlik lenti ilə çəpərləyiblər.

Almaniyada bir qrup sığınacaq axtaran deportasiya qərarlarına etiraz olaraq məhkəmə binasına hücum ediblər.

Hadisə səhər saatlarında Şimali Reyn Vestfaliya əyalətinin Bonn şəhərində qeydə alınıb.

Bonn şəhər Polis Mərkəzindən verilən məlumata görə, bir qrup şəxs məhkəmə binası qarşısına gələrək “Stop deportasiya!” sözünü yazıblar. Daha sonra onlar əllərindəki müxtəlif rəngli boyaları məhkəmə binasına ataraq ərazidən uzaqlaşıblar.

Hadisə yerinə polis əməkdaşları gəlib, qaçan şəxslərin axtarışlarına başlanılıb

Qeyd edək ki, ötən ay Bonn Federal İdarə Məhkəməsində qaçqın statusu üçün baxılan işlərin 80%-də Almaniya Miqrasiya və Qaçqınlarla iş üzrə Federal İdarəsinin rədd cavabı qüvvədə saxlanılıb.

İstinadlar Report

Müdafiə nazirinin təsdiq etdiyi illik hazırlıq planına əsasən, mayın 10-da Azərbaycan Ordusunda gənc əsgərlərin andiçmə mərasimi keçirilib.

Bu barədə “Report”a Müdafiə Nazirliyindən məlumat verilib.

Mərasim Azərbaycan Respublikasının Dövlət Himninin səslədirilməsi ilə başlayıb. Gənc əsgərlər təntənəli surətdə hərbi andı qəbul edərək Vətənə sadiq olacaqlarına söz veriblər.

Sonra Müdafiə Nazirliyinin nümayəndələri və hərbi hissə komandanlığı gənc əsgərləri hərbi andı qəbul etmələri münasibəti ilə təbrik edib, xidmətlərində nizam-intizamlı, vicdanlı və cəsarətli olmağı, həvalə edilmiş silah və texnikanı dərindən öyrənməyi, Vətənə olan əsgəri borcunu ləyaqətlə yerinə yetirməyi arzulayıblar.

Yekunda şəxsi heyət təntənəli marşla tribuna önündən keçib.

İspaniyada koronavirus epidemiyası səbəbindən 6 aydır ölkə daxilində tətbiq olunan fövqəladə vəziyyət sona çatıb.

Komendant saatı ləğv olunduqdan sonra minlərlə insan ölkənin müxtəlif şəhərlərində meydanlara axın edib.

Maskasız yüzlərlə insan Madridin Puerta-del-Sol meydanına toplaşaraq küçə ziyafəti təşkil edib. Əsasən gənclərdən ibarət olan kütlə epidemiyanı unudaraq əylənib. Atəşfəşanlıqdan sonra polis izdihamı dağıtmaq üçün müdaxilə etməli olub.

Madrid bələdiyyə başçısı Xose Luis Martnez-Almeyda isə fövqəladə vəziyyətin qaldırılmasından sonra yaranan izdihamı “kədərli mənzərə” adlandırıb.

Müdafiə Nazirliyi Azərbaycan xalqının ümummilli lideri, müasir və müstəqil Azərbaycanın memarı Heydər Əliyevin anadan olmasının 98-ci ildönümü münasibəti ilə sənədli film hazırlayıb.

“Report” “Heydər Əliyev 98 – Tarix yazan şəxsiyyət” adlı filmi təqdim edir:

Mayın 10-da Azərbaycan xalqının ümummilli lideri Heydər Əliyevin anadan olmasının 98-ci ildönümü münasibəti ilə Müdafiə naziri general-polkovnik Zakir Həsənov və nazirliyin digər rəhbər heyəti Fəxri xiyabanı ziyarət ediblər.

Müdafiə Nazirliyinin rəhbərliyi Ulu Öndərin məzarı önünə gül dəstələri qoyub, xatirəsini hörmət və ehtiramla yad ediblər.

İstinadlar Report

Vətən müharibəsi Azərbaycanın erməni işğalçıları üzərindəki tarixi qələbəsi və işğalda olan torpaqlarımızın azad edilməsi ilə nəticələndi. İşğal altında olarkən bu ərazilərdəki tarixi abidələri ermənilər dağıntılara və mənimsəmələrə məruz qoyublar. Hətta ermənilər mənimsədikləri abidələrin bəzilərini erməni abidələri adi ilə pasportlaşdırmışdılar.

Mənəvi Dəyərlərin Təbliği Fondunun icraçı direktoru Mehman İsmayılov “Report”un Kəlbəcərə ezam olunmuş əməkdaşına deyib ki, işğaldan azad olunan ərazilərdəki abidələrin qorunması və mühafizəsi üçün onların pasportlaşdırılmasına başlanılıb.

Qeyd edək ki, Dağlıq Qarabağ və ətraf rayonlar işğalda olan zaman ermənilər tərəfindən dağıntılara və mənimsəmələrə məruz qalıb.
Dağıntılara, vandalizm əməllərinə məruz qalan abidələrimiz İslam mədəniyyətinə aid olan abidələrdir. Bu abidələri ermənilər mənimsəyə bilmədikləri üçün kütləvi şəkildə dağıdıblar. Çünki həmin abidələr üzərində ərəb əlifbası ilə epiqrafik yazılar olub. Bunlar məscidlər, qəbirüstü məzar daşları, türbələr və ziyarətgahlardır.

Mənimsənilən abidələr isə Azərbaycanın qədim dövlətlərindən olan Qafqaz Albaniyası dövrü və Orta əsrlərə aid xristian dini təyinatlı komplekslərdir. Bu abidələrin bir çoxunun əvvəlki vəziyyəti dəyişdirilib, bərpa adı ilə erməniləşdirilməsi işləri aparılıb və ermənilər tərəfindən mənimsənilib.

Mayın 9-da Müdafiə naziri general-polkovnik Zakir Həsənov və nazirliyin digər rəhbər heyəti İkinci Dünya müharibəsində faşizm üzərində Qələbənin 76-cı ildönümü münasibətilə iki dəfə Sovet İttifaqı Qəhrəmanı, general-mayor Həzi Aslanovun abidəsini ziyarət ediblər.

Bu barədə Müdafiə Nazirliyindən məlumat verilib.

Müdafiə Nazirliyinin rəhbərliyi abidə önünə gül dəstələri qoyub, İkinci Dünya müharibəsində misilsiz qəhrəmanlıqlar göstərmiş xalqımızın igid oğullarının əziz xatirəsini dərin ehtiramla yad ediblər.

Türk bəstəkarı Turqay Evren Qarabağın işğaldan azad edilməsinə mahnı bəstələyib, Amerika müğənnisi Della Maylz isə onu ifa edib.

Qeyd edilir ki, türk bəstəkarın “Many Years Ago” (“İllər əvvəl”) adlı yeni mahnısı Azərbaycanın Qarabağ regionunun Ermənistanın çoxillik işğalından azad olunmasına həsr edilib.

Amerika müğənnisi Della Maylz tərəfindən ifa edilən kompozisiya Ermənistan Silahlı Qüvvələrinin Azərbaycanın incisi – Qarabağın Şuşa şəhərini işğal etdiyi 1992-ci ildə baş verən faciəli hadisələrin xatirəsinə mayın 8-də tvitter sosial şəbəkəsində və “YouTube” hostinqində yayımlanıb.

“Ermənilər Azərbaycanın dinc sakinlərinə, o cümlədən qadınlara və uşaqlara qarşı bir çox qanunsuzluqlar və cinayətlar törətdilər. Azərbaycan xalqının ağrıları uzun illərdir qəlbimdə əks-səda verir”, – deyə bəstəkar Turqay Evren “Anadolu”ya bildirib.

Onun sözlərinə görə, Qarabağın azad edilməsinə ingilis dilində mahnı bəstələmək qərarı Cənubi Qafqaz həqiqətləri haqqında məlumatları dünyanın ən çox insanına çatdırmaq istəyi ilə əlaqədardır.

“Digərin ölkələrdə də Qarabağ məsələsi barədə eşitməsini istərdim. Amerikalı müğənni Della Maylz ilə mahnını müzakirə etdik. O, fikrimi dəstəklədi və mahnını birlikdə yekunlaşdırdıq. Mahnının aranjimanı ilə Əli Tolqa Demirtaş məşğul oldu”, – Evren deyib.

Daxili İşlər Nazirliyi (DİN) 6 kiloqramdan artıq narkotik vasitəni satmaq istəyən şəxsi saxlayıb. 

DİN Mətbuat xidmətindən verilən məlumata görə, əvvəllər də eyni əməli törətdiyinə görə məhkum olunan Zamin Hüseynov saxlanılıb.

Onun Lənkəran şəhərində yaşadığı evə baxış keçirilən zaman ümumi çəkisi 6 kiloqram 364 qram olan narkotik vasitə, o cümlədən 1 kiloqram 370 qram heroin, 2 kiloqram 850 qram tiryək, 440 qram həşiş, 1 kiloqram 704 qram psixotrop maddə metamfetamin və narkotik vasitələrin satışında biləvasitə istifadə etdiyi 1 ədəd elektron tərəzi aşkar edilib.

Həmçinin Zamin Hüseynovun mənzilindən satışı və istifadəsi qəti qadağan edilən ümumi sayı 7035 ədəd olan güclü təsiredici vasitələr “Metadon 40” və “Pregabalin” həbləri aşkar edilərək götürülüb.

Saxlanılan şəxs ifadəsində şəxsiyyəti hələlik istintaqa məlum olmayan xarici ölkələrdən birinin vətəndaşının sifarişi ilə külli miqdarda yüksək təsiredici xassəyə malik narkotik vasitələri ayrı-ayrı şəxslərə çatdırmaq məqsədi ilə ölkə ərazisinə gətirdiyini bildirib. Zamin Hüseynov narkotik vasitələrin paytaxt Bakı və bölgələrdə şəxsiyyətləri istintaqla araşdırılan şəxslərə çatdırmaqla satışını təşkil etməli imiş.

Qeyd edilən faktla bağlı Cinayət Məcəlləsinin müvafiq maddələri ilə cinayət işi başlanılıb və Zamin Hüseynov istintaqa cəlb olunub.  Cinayət işi üzrə zəruri istintaq və əməliyyat tədbirləri davam etdirilir.