“Azəriqaz” İstehsalat Birliyi tərəfindən qaz xətlərinin istismarı zamanı yaranmış çatışmazlıqların aradan qaldırılması ilə bağlı mütəmadi olaraq qaz xətləri hava təzyiqi altında kipliyə və möhkəmliyə qarşı yoxlanılır. 

Bu qurumdan bildirilib.

Məlumata görə, adətən payız-qış mövsümündə qaz təzyiqi təlabata uyğun olaraq artırılan zaman Birliyin Regional qaz istismarı İdarələrinin apardığı ən vacib tədbirlərdən biri qaz xətlərinin kipliyə və möhkəmliyə qarşı yoxlanılmasıdır:

“Bəzən fərdi evlərdə istilik sisteminin çəkilişi zamanı vətəndaş ehtiyatsızlığı nəticəsində su xətti qaz xəttinə qoşulur. Eyni zamanda müəyyən qazıntı işləri zamanı qaz xətləri zədələnir, nəticədə həmin borulara qrunt və yağış suları dolur. Qaz xəttinə daxil olan su kütləsi qaz təchizatında böyük problemlərə gətirib çıxarır. Belə olduqda “Azəriqaz” İB-nin əməkdaşları qaz təchizatını müvəqqəti dayandıraraq kompressorlar vasitəsilə kəmərlərə müəyyən atmosfer gücündə yüksək təzyiqli hava vurur. Bu, alternativi olmayan standart prosedurdur. Təəssüflər olsun ki, bu hal bəzi sosial şəbəkə istifadəçiləri üçün manipulyasiya mənbəyi kimi istifadə olunur. Bəziləri hesab edir ki, qaz xətlərinə hava vurulması artıq sərfiyyata hesablanır”.

Azərbaycan Yerüstü Nəqliyyat Agentliyi (AYNA) tərəfindən “Ukrayna dairəsi”ndə yol hərəkətinin təkmilləşdirilməsi məqsədilə yeni layihə hazırlanıb.

Bu barədə AYNA məlumat yayıb.

Bildirilib ki, ərazidə yol infrastrukturu, küçə-yol şəbəkəsi və nəqliyyat axını təhlil edilib:

“Həmin kəsişmə üçün ən optimal həll üsulu kimi turbo tipli dairənin inşası nəzərdə tutulub. Təklif layihəsi Nəqliyyatı Əlaqələndirmə Şurasında müvafiq qaydada təsdiq edilib. Təklif edilən turbo tipli dairə ölkəmiz üçün nizamlanmayan mürəkkəb yol kəsişmələrində yeni bir yanaşma, müasir həll yolu hesab edilir.

Hazırda dairənin standartlara uyğun olmaması burada bir sıra nəqliyyat problemlərinə səbəb olur. Belə ki, dairənin giriş-çıxış saylarının 2 və ya 3 hərəkət zolağından ibarət olmasına baxmayaraq, dairənin daxilində bu, 6, 7 bəzi hallarda isə 8 zolaqdan ibarətdir. Bu da dairədə tıxac hallarından daha çox təhlükəsizlik səviyyəsinin aşağı düşməsinə səbəb olur.

Yeni layihəyə əsasən, Məhəmməd Hadi küçəsindən Vunq Tau küçəsinə, həmçinin Neapol və Aşıq Ələsgər küçələrindən Məhəmməd Hadi küçəsinə  dairəyə daxil olmadan birbaşa sağa hərəkət etmək olacaq. Dairədə hərəkət 3 zolağa bölünəcək. Həmçinin yol kəsişmələrində piyada təhlükəsizliyinin təmin olunması üçün səki sahələri və eynisəviyyəli piyada keçidləri təşkil ediləcək”.

Qeyd olunub ki, layihə həyata keçirildikdən sonra:

– münaqişəli nöqtələr minimuma endirilərək təhlükəsizlik təmin olunacaq;

– dairənin buraxılış qabiliyyəti artırılacaq;

– hesabi hərəkət şiddəti və sürəti optimallaşacaq;

– piyadaların təhlükəsizliyi və rahatlığı təmin ediləcək.

Bundan başqa, layihə çərçivəsində təhlükəsizliyin təmin edilməsi məqsədilə hərəkətin kanallaşdırılması, zəruri olan yol nişanları və nişanlanma xətlərinin təşkili də nəzərdə tutulub.

Bildirilib ki, bu tip dairələr nəqliyyat sahəsində inkişaf etmiş bir çox Avropa ölkələrində, xüsusilə Almaniya, Norveç, Niderland kimi ölkələrdə də geniş istifadə olunur.

Layihə simulyasiyasını təqdim edirik:

Mingəçevir şəhərində yaşayan tanınmış xanəndə Ramiz Bəşirov vəfat edib.

Muğam ifaçısı xəstəlik səbəbindən dünyasını dəyişib.

Qeyd edək ki, Ağdam musiqi məktəbinin yetirməsi olan R.Bəşirov 30 ildən artıq idi, Mingəçevirdə yaşayırdı. O, Mingəçevirdə və ətraf rayonlarda el sənətkarı kimi tanınıb.

Vətəndaşlar artıq “mygov” tətbiqi vasitəsilə onlayn qaydada nikahlarını qeydiyyata ala bilərlər.

Nikaha daxil olacaq vətəndaşların əvvəlcə tibbi müayinədən keçməsi şərtdir.

Müayinədən 14 gün sonra qan analizinin nəticələri avtomatik olaraq “mygov” platformasına yüklənir və istifadəçilər nikah qeydiyyatına müraciət etməyə başlamaq barədə bildiriş alırlar.

Daha sonra tətbiqdə “Həyat hadisələri” bölməsində yer alan “Ailə qurmaq” seçimini və ya “Xidmətlər” bölməsindən “Nikahın qeydiyyata alınması” xidmətini seçir.

Bununla da sistem hər iki tərəfin tibbi arayışlarını yoxladıqdan sonra FİN və təsdiq kodları ilə qeydiyyat ekranı açır.

Tərəflərdən biri digərinə FİN və təsdiq kodunu göndərərək, nikah qeydiyyatı üçün müraciətini davam etdirir. Nikah sonrası götürüləcək soyadı və şəhadətnamə təhvilalma mərkəzini seçirsiniz, məlumatlarınızı təsdiqləyirsiniz.

30 gün sonra xidmətin statusunun dəyişməsi ilə bağlı vətəndaşa bildiriş gəlir. Status “Tamamlanıb” olaraq göründüyü zaman 10 AZN məbləğində dövlət rüsumunu ödəməlisiniz. Şəhadətnaməniz hazır olduqda seçdiyiniz təhvilalma mərkəzindən onu əldə edə bilərsiniz.

Ətraflı “Baku TV”nin süjetində:

Kibercinayətkarların vətəndaşlara toy dəvətnamələri göndərərək dələduzluq etdikləri barədə məlumatlar yayılıb.

Son günlər vatsap mesajlaşma tətbiqi vasitəsilə vətəndaşlara əvvəlcə sadə bir fayl əlavəsi “toy dəvətnaməsi” kimi göndərilir.

Həmin faylı yüklədiyiniz zaman telefonunuza zərərli proqram quraşdırılır və siz hakerlərə uzaqdan giriş icazəsini vermiş olursunuz.

Məsələ ilə bağlı Daxili İşlər Nazirliyinin əməkdaşı Elbrus İbrahimov vətəndaşları bu kimi hallarda diqqətli olmağa çağırıb.

Daha ətraflı “Xəzər Xəbərin” videomaterialında:

Bir neçə gün əvvəl Rusiyanın Yekaterinburq şəhərində geniş ictimai rezonansa səbəb olan yol qəzası baş verib.

Noyabrın 14-də şəhər küçələrindən birində yol hərəkəti qaydalarını kobud şəkildə pozaraq qarşıdan gələn zolağa çıxan “Bentley” markalı avtomobil sola dönmək üzrə olan “Hyundai Solaris” markalı avtomobillə toqquşub. Zərbə nəticəsində “Hyundai” markalı avtomobilə ciddi ziyan dəyib, sürücüsü isə ağır yaralanıb. “Bentley” daha sonra idarəetməni itirərək yolun kənarındakı beton dirəyə çırpılıb və aşıb.

Məlum olub ki, “Bentley”i Yekaterinburqda bir neçə ticarət obyektinin sahibi, azərbaycanlı iş adamı Şamil İsayevin oğlu 22 yaşlı Emil İsayev idarə edib. Emil bloqçuluq fəaliyyəti ilə də məşğul olur. Qəza zamanı o, ağır bədən xəsarətləri alıb.

Bildirilir ki, gənc üç il əvvəl sürücülük vəsiqəsi alıb. Bu müddət ərzində o, dəfələrlə yol hərəkəti qaydalarını pozub.Onun adına 194 ödənilməmiş cərimə var.

Fövqəladə hadisədən üç gün sonra “Hyundai” sürücüsünün xəstəxanada ölməsi ilə bağlı internetdə məlumat yayılsa da, sonradan rəsmi mənbələr bunu təkzib edib.

Onlayn ictimai səhifələrdə Emilin idarə etdiyi “Bentley” markalı avtomobilin əvvəllər Sverdlovsk vilayətində tanınmış kriminal avtoritet Marsel Qasanova məxsus olduğu da bildirilir. Mənbələrin bildirdiyinə görə, Həsənov avtomobili azərbaycanlı iş adamlarından birinin borcunun ödənilməsi kimi alıb. Emilin bu cinayət başçısı ilə dostluq münasibəti saxladığı iddia edilir.

Qeyd olunur ki, Marsel Həsənov əvvəllər quldurluq cinayətinə görə məhkum olunub. Sverdlovsk vilayətində cəza çəkərkən o, kriminal avtoritet statusu alıb.

2016-cı ildə azadlığa çıxandan sonra Həsənov bəzi mənbələrə görə kriminal aləmdən olan insanları ətrafına toplamağa başlayıb. 2019-cu ildən mütəmadi olaraq hüquq-mühafizə orqanlarının diqqətinə düşüb.

2022-ci ildə Yekaterinburqda “toplantı” zamanı Həsənov döyülüb. 2023-cü ildə polis onu saxlasa da, tezliklə buraxıb. Hüquq-mühafizə orqanlarının əməkdaşları həbsi “müntəzəm qabaqlayıcı əməliyyat tədbiri” adlandırıblar.

Gürcüstan Mərkəzi Seçki Komissiyasının sədri Giorgi Kalandarişvilinin üzünə qara rəngli boya atılıb.

Müxalifət nümayəndəsi David Kirtadze komissiyanın oturduğu masaya yaxınlaşaraq sədrin üzünə boya atıb.

Bundan sonra Kirtadze zalı tərk edib və MSK-nın iclası müvəqqəti olaraq dayandırılıb.

Xatırladaq ki, Gürcüstanda parlament seçkiləri oktyabrın 26-da keçirilib.Hakim “Gürcü arzusu” partiyası 53,93 faiz səs toplayıb. Dörd müxalifət partiyası da cəmi 37,78% səs toplayaraq parlamentə daxil olub. Müxalifət seçkinin nəticələri ilə razılaşmayaraq etiraz aksiyalarına başlayıb.

Bakının Yasamal rayonunda yerləşən 5 mərtəbəli yataqxana uzun müddətdir ki, qəzalı vəziyyətdədir.

Zahid Xəlilov 54 ünvanında yerləşən bu binada 95 ailə yaşayır. İstismar müddətini bitirmiş bu yataqxanada yaşayan sakinlər binanın təhlükəli vəziyyətdə olduğunu bildirir, şəraitsizliyindən gileylənirlər. 

60-dan çox yaşı olan binanın tavan hissəsindəki beton parçalar qopub tökülür, sanitar qovşaqları istifadəyə yaramır, elektrik naqilləri də təhlükə saçır.  

Məsələ ilə bağlı Bakı Şəhər İcra Hakimiyyətindən bildirilib ki, hazırda paytaxtda 1100 qəzalı bina var: “Sözügedən binaların inventarisasiyası və bu binalarda yaşayan sakinlərin təhlükəsizliyinin təmin edilməsi ilə bağlı artıq komissiya fəaliyyətə başlayıb. Binaların bir çoxu da mərhələli şəkildə sökülür”.

Qəzalı vəziyyətdə olan həmin binadan hazırlanan süjeti təqdim edirik: 

Yeni Zelandiyada deputatlar Haka xalqlarının tarixi ritualını rəqs edərək qanun layihəsinin əleyhinə çıxış ediblər.

“Te Pati Maori” partiyasının nümayəndələrinin icra etdiyi rəqs səbəbindən parlamentin işi müvəqqəti dayanıb. 

Bildirilib ki, partiya nümayəndələri bununla 1840-cı ildə Britaniya müstəmləkəçiləri və Maori başçıları arasında imzalanan Vaytanti razılaşmasının yenidən baxılmasını nəzərdə tutan qanun layihəsinə etiraz ediblər. 

Bu razılaşma isə qeyd olunan iki tərəf arasında birgə idarəetmənin şərtlərini müəyyən edirdi. Zamanla məhkəmələrin və xüsusi tribunalın qərarları maorilərin hüquq və imtiyazlarını genişləndirməyə başlayıb. Yeni Zelandiyanın bir çox sakini isə bunu yerli olmayan vətəndaşlara qarşı ayrı-seçkilik kimi qəbul edib. 

Deputatların rəqsi sosial şəbəkələrdə və dünya mediasında maraqla qarşılanıb.

Həmin görüntüləri təqdim edirik:

Fövqəladə Hallar Nazirliyinin “112” qaynar telefon xəttinə Bakı şəhərinin Xəzər rayonu, Albalılıq qəsəbəsi ərazisində 1 nəfərin su quyusuna düşərək təhlükəli vəziyyətdə qalması barədə məlumat daxil olub.

Bu FHN-in mətbuat xidmətindən məlumat verilib.

Məlumatla əlaqədar FHN-in Xüsusi Riskli Xilasetmə Xidmətinin xilasediciləri dərhal çağırış üzrə cəlb olunub.

Hadisə yerində əməliyyat şəraiti qiymətləndirilərkən müəyyən olunub ki, 2008-ci il təvəllüdlü İsmayılov Vaqif Emin oğlu fərdi yaşayış evinin həyətyanı sahəsində dərinliyi təqribən 30 metr olan su quyusuna düşən iti xilas etmək istəyərkən özü də quyuya düşərək təhlükəli vəziyyətdə qalıb.

Xilasedicilər alpinist ləvazimatlarının köməyi ilə V.İsmayılovu və iti quyudan çıxararaq xilas ediblər.

Sumqayıtda pomidor turşusundan zəhərlənən qadın ölüb.

Hadisə Sumqayıt şəhər, Ceyranbatan bağları ərazisində qeydə alınıb.

1971-ci il təvəllüdlü Elnarə Qəfərova yaşadığı mənzildə pomidor turşusundan zəhərləndiyi üçün noyabrın 12-si Bakı şəhər Toksikologiya Xəstəxanasına müraciət edib. Aparılan müalicə və müayinələrə baxmayaraq, o, dünən müalicə aldığı xəstəxanada vəfat edib.

Kliniki Tibbi Mərkəzdən bildirilib ki, noyabrın 12-də turşudan zəhərlənən qadın ağır vəziyyətdə mərkəzə hospitalizasiya edilib. Bütün reanimasyon tədbirlərə baxmayaraq, noyabrın 14-ü ölüm faktı qeydə alınıb.

Ətraflı sujetdə: