Kürdəxanıda “Ləhiş bağları” adlanan ərazidə unikal hadisə baş verib.

Evdən işə gedən vətəndaş qayıdanda darvazasının dəyişdirildiyini görüb.

Ev sahibi Tural Məhərrəmovun sözlərinə görə, bu ev ona babasından miras qalıb. Hər yay ailəsi ilə birgə həmin evdə yaşayıb. Elə bu yay da həmin proses aidiyyəti üzrə təkrarlanıb. Amma bu dəfə fərqli ssenari yaşanıb.

Belə ki, ev sahibi iddia edir ki, onlar evə gələndə qapıya “Bağın sahibi”nin adından nömrə yazılıb yapışdırılıb. Həmin nömrə ilə əlaqə saxlayıb və izah edib ki, bu ona babasından qalma evdir.

Elə hər şey də bundan sonra başlayıb. T.Məhərrəmov işdən gələndə görüb ki, evin giriş qapısı yerindən çıxarılıb yenisi ilə əvəzlənib. Onun sözlərinə görə, evə  “əl qoymaq” istəyənlər özlərini əmlakçı kimi təqdim edən fırıldaqçılardır.

Məsələ ilə bağlı DİN-in mətbuat xidmətinin verdiyi açıqlamada qeyd olunub ki, vətəndaşın müraciəti ilə bağlı araşdırmalara başlanılıb.

Ətraflı: “Real TV”nin reportajında:

FHN-in “112” qaynar xəttinə Abşeron rayonu, Mehdiabad qəsəbəsində sexdə yanğın baş verməsi barədə məlumat daxil olub.

Bu FHN-in mətbuat xidmətindən məlumat verilib.

Məlumatla əlaqədar FHN-in Dövlət Yanğından Mühafizə Xidmətinin qüvvələri dərhal əraziyə cəlb olunub.

Hadisə yerində əməliyyat şəraiti qiymətləndirilərkən yanğının çörəkbişirmə sexində baş verdiyi və yayılma riskinin yüksək olduğu müəyyən olunub.

Yanğınsöndürənlərin operativ müdaxiləsi sayəsində baş vermiş yanğın genişlənərək daha böyük sahəyə yayılmasına, o cümlədən bitişik obyektlərə keçməsinə imkan verilmədən qısa müddətdə söndürülüb.

Yanğın nəticəsində ümumi sahəsi 400 kv.m. olan çörəkbişirmə sexinin dam örtüyünün taxta atmaları və şüşə-pambıq üzlüyü 200 kv.m. sahədə yanıb.

Sexin qalan hissəsi və bitişik obyektlər yanğından mühafizə olunub.

Fövqəladə Hallar Nazirliyinin “112” qaynar telefon xəttinə Bakı şəhərinin Xətai rayonu, Ceyhun Həsənov küçəsində yerləşən çoxmərtəbəli yaşayış binasında azyaşlıların mənzildə bağlı qapı arxasında köməksiz vəziyyətdə qalması barədə məlumat daxil olub.

Bu haqda “Qafqazinfo”ya FHN-dən bildirilib.

Qeyd olunub ki, məlumatla əlaqədar hadisə yerinə dərhal FHN-in Bakı Regional Mərkəzinin xilasediciləri cəlb olunub.

Xilasedicilər xüsusi alpinist ləvazimatlarından istifadə etməklə onaltımərtəbəli binanın 4-cü mərtəbəsində yerləşən mənzilə pəncərədən daxil olub və köməksiz vəziyyətdə qalan azyaşlılar – 2018-ci il təvəllüdlü Y.Axundzadəni və 2021 ci il təvəllüdlü A.Axundzadəni xilas edərək ailə üzvlərinə təhvil veriblər.

Türk Akademiyası Türk Dövlətləri Təşkilatı (TDT) tərəfindən yaradılan Türk Dünyası Ortaq Əlifba Komissiyasının 34 hərfdən ibarət Ortaq Türk Əlifbası təklifi ilə bağlı razılığa gəldiyini açıqlayıb.

Bununla türk dövlətləri arasında ortaq əlifba sistemi fəaliyyət göstərəcək.

Qeyd edək ki, bu əlifba heç də bütün türk dillərində olan səsləri, işarələrin, fonemlərin tam cədvəli deyil.

Türk dövlətləri öz əlifbalarını dəyişdiyi halda məhz ortaq əlifbadakı işarələrə müraciət etməlidilər.

Bəs ortaq əlifbada bizə tanış olmayan hansı hərflər öz əksini tapıb?

Ətraflı “Xəzər Xəbər”in süjetində:

Bu ilin ilk 6 ayı ərzində Azərbaycana 71 milyon 44 min dollar dəyərində 13 min 509 ton kərə yağı və süddən hazırlanmış digər yağlar idxal olunub. Bu da 2023-cü ilin eyni dövrü ilə müqayisədə 24 milyon dollar və ya 51% çoxdur.

Bəzi kərə yağları 3, bəziləri isə 6 manat bahalaşıb.

Bahalaşmanı satıcılar da təsdiqləyirlər.

Ekspertlər isə bildirir ki, bu qida məhsulunun bahalaşması dünya bazarlarında da müşahidə olunur.

Ətraflı “Xəzər Xəbər”in videomaterialında:

Azərbaycan Dövlət Su Ehtiyatları Agentliyinin İri Şəhərlərin Birləşmiş Su Təchizatı Xidməti istehlakçıların içməli su ilə təmin olunması və kanalizasiya xidmətlərindən istifadəsinin yaxşılaşdırılması, eləcə də mövcud sistemlərin müntəzəm işinin təmin olunması məqsədilə yeni layihələr həyata keçirir. 

Bu barədə İri Şəhərlərin Birləşmiş Su Təchizatı Xidmətinin Mətbuat xidməti məlumat yayıb. 

Bildirilib ki, Bakı şəhərində içməli su və tullantı su şəbəkələrinin təmir-bərpa işləri aparılır. Hazırda planla nəzərdə tutulmuş işlərin əksər hissəsi yekunlaşıb. 

Paytaxtın əsas magistral avtomobil yollarından sayılan 8 Noyabr prospekti boyu müxtəlif küçələrdə magistral su kəmərləri dəyişdirilib, 15 nöqtədə abonent xətləri çəkilib və birləşmələr verilib. 

Corat küçəsində içməli su xəttinin inşası işləri yekunlaşmaq üzrədir. Həmin prospektin müxtəlif nöqtələrində mövcud içməli su xətlərinin dəyişdirilməsi işləri davam etdirilir. 

Eyni zamanda Atatürk prospekti ilə Məmməd Araz küçəsinin kəsişməsində, Səbail rayonu Parlament prospekti, Teymur Elçin küçəsində, Nərimanov rayonu Əhməd Rəcəbli, Əhməd bəy Ağaoğlu küçələrində, Suraxanı rayonu Səttar Bəhlulzadə küçəsində, Salyan şosesi boyu – Bibiheybət şosesindən Lökbatan dairəsinədək, Dilarə Əliyeva küçəsi boyu, o cümlədən şəhərin müxtəlif yerlərində içməli su xətləri dəyişdirilib və ya təmir-bərpa işləri yerinə yetirilib.

İçməli su şəbəkələri ilə yanaşı tullantı su xətlərinin də təmiri, bərpası, yenilənməsi həyata keçirilib. Tədbirlər Planına uyğun olaraq, Bakı buxtası, Su İdman Sarayı, Dünyagöz xəstəxanası, Bulvar İdarəsi, Yusif Məmmədəliyev küçəsi, “Mariot” otelinin ətrafında və şəhərin müxtəlif nöqtələrində yağış kollektorlarının dənizə çıxış hissələrinin uzadılması işləri görülüb. 

Nəcəfqulu Rəfiyev küçəsində mövcud yağış kanalizasiya xəttinin dənizə çıxış hissəsində neft tutucu qurğu yerləşdirilməsi üçün kamera yağış xəttinin tikintisinə start verilib. 
8 Noyabr prospekti boyu müxtəlif küçələrdə, Binəqədi rayonu Cəfər Xəndan küçəsində, Azadlıq prospektinin kəsişməsində, Səbail rayonu Bibiheybət döngəsi və şəhərin müxtəlif yerlərində kanalizasiya xətlərinin dəyişdirilməsi və ya təmir-bərpa işləri həyata keçirilib. 

Səbail rayonu, Bibiheybət döngəsi, Şamaxı yolu Hökməli dairəsi yaxınlığında kanalizasiya kollektoru tikilib. Tədbirlər Planında işlərin qısa müddətdə başa çatdırılması nəzərdə tutulur.

Təmir-bərpa işləri, köhnə xətlərin, kanalizasiya sistemlərinin yenilənməsi, əhaliyə fasiləsiz suyun verilməsində qısa müddətli fasilələr yaradır. Bu barədə xidmətin sosial şəbəkə hesablarında elanlar yayımlanır, media orqanlarında məlumatlar dərc olunur. Maksimum səviyyədə səy göstərilir ki, yenidənqurma zamanı suyun verilməsində, kanalizasiya sistemlərinin idarə olunmasında əhali çətinlik yaşamasın, fasilələrin müddəti qısa olsun və işlər daha tez yekunlaşsın.

Türkiyənin Çanaqqala şəhərinin Əzine rayonunun Pınarbaşı kəndində itkin düşən 12 yaşlı azərbaycanlı Rəsul Quliyev axtarış qrupları tərəfindən 7 kilometr aralıda ağacın üstündə yatarkən tapılıb.

Bu barədə “Sputnik Türkiye” məlumat yayıb.

Hadisə 9 sentyabr saat 16:00 radələrində baş verib. Azyaşlı səhər saatlarında ailəsi ilə birlikdə məktəbə gedib. Məktəbdən qayıdarkən çantasını cıran 12 yaşlı Rəsul vəziyyəti anasına danışıb. Ana Yaqut Əsgərova Rəsula xəbərdarlıq edib. Xəbərdarlıqlardan sonra qorxan uşaq evi tərk edib.

Axşam saatlarında övladlarının evə qayıtmadığını görən ailə vəziyyəti “112” Təcili Xidmət Xəttinə məlumat verib. Hadisə yerinə cəlb edilən qruplar kənd və ətrafında genişmiqyaslı axtarışlara başlayıb. Kənddəki təhlükəsizlik kameraları bir-bir yoxlanılıb. Rəsul sonuncu dəfə kəndin çıxışında təhlükəsizlik kamerasına düşüb.

Görüntülərə əsasən qruplar, uşağı evindən 7 kilometr aralıda, Bozcaalan adlanan ərazidə ağacın üstündə yatarkən tapıblar.

Rəsul sağlamlıq qrupları tərəfindən müayinə olunmaq üçün xəstəxanaya göndərilib.

Xaçmaz rayonunun Xudat şəhərində ananın öz övladına ağır xəsarətlər yetirdiyi deyilir.

Bu barədə “Xəzər Xəbər” süjet yayımlayıb.

Məlumata görə, Qusar rayon sakini Səyyarə Qayıbova kirayə yaşadıqları mənzildə 7 yaşlı qızına ağır xəsarətlər yetirib.

Hadisə baş verən zaman ata evdə olmayıb. Xəsarət alan azyaşlının ailənin ən böyük övladı olduğu bildirilir.

Övladlarının oyun oynamasına əsəbiləşən 7 yaşlı qızını dəmir parçası ilə döyüb.

DİN-in mətbuat xidmətindən bildirilib ki, hadisəni törətməkdə şübhəli bilinən ana sağlamlığı ilə bağlı xəstəxanaya yerləşdirilib.

Hazırda xəsarət alan azyaşlının müalicəsi Xaçmaz rayon Mərkəzi Xəstəxanasında davam edir.

Faktla bağlı hüquq mühafizə orqanları tərəfindən araşdırma aparılır.

Ailə, Qadın və Uşaq Problemləri üzrə Dövlət Komitəsinin mətbuat xidmətinin rəhbəri Teymur Mərdanoğlu isə bildirib ki, ailədəki digər uşaqların eyni aqibəti yaşamaq ehtimalı nəzərə alınaraq onlar da nəzarətə götürülüblər.

Ətraflı videomaterialda: