FHN-in “112” qaynar xəttinə intensiv yağışlar səbəbindən Naxçıvan şəhəri, Əliabad qəsəbəsi və 20-ci məhəllə ərazisində bəzi evlərin zirzəmisinin subasmaya məruz qalması ilə bağlı məlumatlar daxil olub.

Naxçıvan Muxtar Respublikası Fövqəladə Hallar Nazirliyinin qüvvələri dərhal su basmış ərazilərə cəlb olunub.

Nazirliyin qüvvələri tərəfindən su basmış yerlərdən suyun çəkilərək kənarlaşdırılması təmin edilib, zəruri təhlükəsizlik tədbirləri həyata keçirilib.

Bir neçə ildir, Bakının Nərimanov rayonu ərazisində – Ağa Nemətulla və Çernyayevski küçələrinin kəsişməsində avtomobillərin hərəkətindəki problem həll edilmir. 

Ağa Nemətulla küçəsi təmir edilərkən o vaxt fəaliyyət göstərən Bakı Nəqliyyat Agentliyinin kəsişmədə asfalta çəkdirdiyi dairə hələ də ərazidə çaşqınlıq yaradır.

Belə ki, Ağa Nemətulla kəsişməsində – Nərimanov Rayon Məhkəməsinin köhnə binasının qarşısında geriyədönmə ləğv edildiyindən metronun “Nərimanov” stansiyası istiqamətindən gələrək Heydər Əliyev prospektinə doğru hərəkət edən avtomobillər kütləvi şəkildə bu “dairə”dən istifadə edirlər və geriyə dönməklə tıxaclara, demək olar ki, hər gün çoxsaylı kiçik qəzalara səbəb olurlar. Halbuki burada yolun soluna geriyə dönmək qadağandır işarəsi qoyulub və Ağa Nemətulla küçəsindən gələn avtomobillər yalnız düzünə və sağa hərəkət edə bilərlər. Həmçinin ərazidə dairənin olmasına dair hər hansı işarə və nişan yoxdur. İllər əvvəl yerə çəkilmiş naməlum dairəvi xətt isə demək olar ki, pozularaq görünməz hala düşüb.

Ərazidə müşahidə apararkən burada sürücülərin kütləvi şəkildə Ağa Nemətulla küçəsindən gələrək qaydaları pozmasını və geriyə dönməsini müşahidə etdik. Bu da buradakı kameraların ya işləməməsi, ya da ümumiyyətlə, qaydaları pozan sürücülərin məsuliyyətə cəlb edilmədiyinə dəlalət edir. Qaydaların pozulmasına görə cərimələr tətbiq edilsəydi, bu qədər kütləvi qayda pozuntularının olmayacağı dəqiqdir.

Məlumat üçün bildirək ki, əslində sürücülər qaydaları pozmayaraq, sağa dönüb bir neçə yüz metr qət etməklə Əlicabbar Orucəliyev, Vladimir Mayakovski və ya İsmayıl Hidayətzadə küçələrindən istifadə etməklə Heydər Əliyev prospektinə çıxa bilərlər.

Bundan başqa, Çernyayevski küçəsinin bağlanğıc nöqtəsində, Ağa Nemətulla küçəsi ilə kəsişməsində 67 saylı müntəzəm marşrut xəttinin sonuncu dayanacağı yerləşir. Burada avtobusların yolun hərəkət hissəsini zəbt etməsi, bəzən 3-4 avtobusun ərazidə dayanması da tıxacın artmasına səbəb olan amillərdən biridir.

Bütün qeyd edilənlər bu ərazidə hərəkətin yenidən təşkil edilməsinin zəruriliyini, aidiyyəti dövlət qurumlarının məsələyə operativ və funksional şəkildə yanaşmasının vacibliyini göstərir.

Mövzu ilə bağlı Azərbaycan Yerüstü Nəqliyyat Agentliyinə sorğu ünvanladıq. Qurumdan müraciətimizə cavab olaraq bildirildi ki, qeyd edilən ərazidən keçən sürücülər mövcud nişanların tələblərinə əməl etməlidir: “Ağa Nemətulla küçəsində yol kəsişməsində vaxtilə kustar üsulla asfalta çəkilən dairə cizgisi tərəfimizdən təşkil edilməyib. Uyğunsuzluq aradan qaldırılıb və həmin yol kəsişməsində hərəkətin təşkili məqsədilə müvafiq yol nişanları qoyulub və nişanlanma xətləri çəkilib. Sürücülər də hərəkətdə olarkən ərazidə quraşdırılan yol nişanlarının tələblərini rəhbər tutmalıdırlar”.

Bakı şəhər DYP İdarəsinin baş inspektoru polis baş leytenantı Rüstəm Əhmədli isə saytımıza bildirib ki, sözügedən ərazidə məlumatverici-göstərici hərəkət sxemi nişanı, sonra isə məcburedici (düzünə sağa) nişanı ilə təchiz olunub: “Sürücülər tərəfindən geriyədönmə əməliyyatı aparıldıqda artıq yol hərəkəti qaydalarının pozulması baş verir. Sürücülərə bildirmək istəyirik ki, bu istiqamətdə hərəkətdə olarkən diqqətli davranaraq yalnız düzünə və sağa hərəkət edə bilərlər. Yol hərəkəti qaydalarını pozduqarı halda vizual şəkildə aşkar olunarsa, Yol Patrul Xidməti inspektorları tərəfindən, digər halda isə Xüsusi Texniki Vasitə tərəfindən inzibati məsuliyyətə cəlb olunacaqlar”.

2024-cü ilin hazırlıq planına uyğun olaraq, Azərbaycan Ordusunun Mühəndis Qoşunlarının bölmələrində sürücü-mexanik və sürücü heyətləri ilə toplanışlar keçirilir.

Bu barədə Müdafiə Nazirliyindən məlumat verilib.

Bildirilib ki, toplanışlar zamanı hərbi qulluqçular qarşıya qoyulan tapşırıqların icrasında peşəkarlıq nümayiş etdirirlər:

“Plana əsasən keçirilən toplanışlarda əsas diqqət şəxsi heyətin döyüş hazırlığının təkmilləşdirilməsi, bilik və bacarıqlarının artırılması, eləcə də praktiki vərdişlərinin inkişaf etdirilməsinə yönəldilib”.

Fövqəladə Hallar Nazirliyinin “112” qaynar telefon xəttinə Qubadlı rayonu, Xəndək kəndində yanğın baş verməsi barədə məlumat daxil olub.

Bu barədə FHN-dən məlumat verilib.

Bildirilib ki, məlumatla əlaqədar dərhal əraziyə FHN-in Dövlət Yanğından Mühafizə Xidmətinin qüvvələri cəlb olunub.

Əməliyyat şəraitinə uyğun olaraq həyata keçirilmiş zəruri və təxirəsalınmaz tədbirlər sayəsində açıq ərazidə baş vermiş yanğın geniş sahələrə yayılmasına imkan verilmədən qısa müddətdə söndürülüb.

Yanğın nəticəsində təxminən 20 hektar sahədə quru ot, kol-kos və seyrək ağaclıq yanıb.

Ətraf ərazilər yanğından mühafizə olunub.

Fövqəladə Hallar Nazirliyinin Dövlət Yanğın Nəzarəti və Dövlət Yanğından Mühafizə xidmətlərinin birgə təşkilatçılığı ilə Nərimanov rayonu, Fətəli Xan Xoyski küçəsi, 14 ünvanında fəaliyyət göstərən “Gənclik Mall” ticarət mərkəzində “Fövqəladə hallar zamanı davranış qaydaları və təxliyə” mövzusunda təlim keçirilib.

FHN-in müvafiq canlı qüvvə və texnikasının cəlb edildiyi təlimin keçirilməsində məqsəd “Gənclik Mall” ticarət mərkəzinin kollektivinə fövqəladə hallar, o cümlədən yanğın zamanı davranış qaydalarının aşılanması, habelə belə obyektlərdə mümkün yanğınlar zamanı yanğından mühafizə bölmələrinin fəaliyyətinin daha da təkmilləşdirilməsi olub.

Təlimin nəzəri hissəsində FHN-in əməkdaşları ticarət mərkəzinin kollektivinə fövqəladə hallar, o cümlədən yanğınlar zamanı zəruri davranış qaydaları, təxliyə tədbirləri barədə ətraflı məlumat veriblər. Həmçinin, tədbir iştirakçılarına ilkin yanğınsöndürmə vasitələrindən istifadə qaydaları əyani şəkildə nümayiş etdirilib, suallar cavablandırılıb.

Təlimin praktiki hissəsində şərti yanğınla əlaqədar “Həyəcan” siqnalı verildikdən sonra Dövlət Yanğından Mühafizə Xidməti Nərimanov rayon Yanğından Mühafizə Hissəsinin qüvvələri operativ qaydada hadisə yerinə çataraq, “yanğınla mübarizə” tədbirlərinə başlayıblar.

Şərti yanğın baş vermiş ticarət mərkəzində təxliyə planına uyğun olaraq işçilərin təhlükəsiz yerə təxliyəsi həyata keçirilib, şərti xəsarət almış şəxslərə “ilkin yardım göstərilib”, “yanğın qısa müddətdə söndürülüb”.

Uğurla keçən təlimdən sonra əldə edilmiş nəticələr müzakirə olunub, müvafiq tapşırıqlar verilib.

Bakının Binəqədi rayonunda narkoşəbəkənin 5 üzvündən 28 kiloqram narkotik vasitə aşkarlanıb.

Bu barədə Daxili İşlər Nazirliyinin (DİN) Mətbuat xidmətindən məlumat verilib

Bildirilib ki, Binəqədi Rayon Polis İdarəsi əməkdaşları tərəfindən narkotik vasitələrin satışı və qanunsuz dövriyyəsi ilə məşğul olan mütəşəkkil dəstənin üzvlərinə qarşı əməliyyatlar keçirilib. tədbirlərlə əvvəllər narkotiklə bağlı cinayətlərə görə məhkum olunmuşlar Ruslan Azadzadə, Röyal Feyzullayev, Zaur Abdullayev, Fərid Rəcəbov və Mahir Əliyev saxlanılıblar.

Onlardan ümumilikdə 28 kiloqram narkotik vasitə, o cümlədən 15 kiloqram heroin, 6 kiloqram tiryək və 7 kiloqram tərkibi psixotrop maddələlərlə zənginləşdirilən marixuana aşkarlanıb.
Saxlanılan şəxslər narkotik vasitələri şəxsiyyəti istintaqla araşdırılan İran vətəndaşlarından əvvəlcədən müəyyənləşdirilən məkandan götürərək satışını həyata keçirməyi və maddi qazanc müqabilində ayrı-ayrı ünvanlara çatdırmağı planlaşdırıblar.

“Faktlarla bağlı Cinayət Məcəlləsinin müvafiq maddələri ilə cinayət işləri başlanılıb, saxlanılan şəxslər barəsində məhkəmə tərəfindən həbs qətimkan qərarı verilib. R.Azadzadə, R.Feyzullayev, Z.Abdullayev, F.Rəcəbov və M.Əliyevin daxil olduqları mütəşəkkil dəstənin digər üzvlərinin də saxlanılması istiqamətində əməliyyat tədbirləri davam etdirilir”,- məlumatda qeyd olunub.

İstinadlar Report

“Azərişıq” ASC ölkənin bütün regionları ilə yanaşı Bakının ətraf kənd və qəsəbələrində də elektrik təsərrüfatını yeniləyir.

Həyata keçirilən yenidənqurma işləri çərçivəsində Xəzər rayonunda nəzərdə tutulan 27 yeni güc mərkəzindən 20-si artıq quraşdırılıb.

Bir sıra komplekt transformator məntəqələrdə (KTM) son tamamlanma işləri həyata keçirilir. Rayonun 45 minə yaxın abonenti olan Binə qəsəbəsinin də elektrik şəbəkəsi yenidən qurulur. Binə qəsəbəsində 9 ədəd yeni güc mərkəzi layihələndirilib. Bunlardan 5-i tamamlanıb, 4-ündə isə tamamlanma işləri görülür.

Binə Sovxoz ərazisində də tələbata uyğun olaraq yeni güc mərkəzi yaradılır. Qəsəbədə 0,4 və 6 kV-luq elektrik xətləri yenisi ilə əvəzlənir, izolyasiyalı naqillər çəkilir, müasir tipli dayaqlar əkilir, köhnə sayğaclar yenilənir. Bir sıra ərazilərdə elektrik enerjisinin verilişində yaranan çətinliklərin aradan qaldırılması üçün 6/10 kV-luq hava xətlərində təmir işləri aparılır.

Abonentlərin fasiləsiz, dayanıqlı elektrik enerjisi ilə təmin edilməsi və elektrik enerjisi itkilərinin minimuma endirilməsi məqsədilə “Azərişıq” ASC yenidənqurma işlərini ölkənin bütün regionlarında, həmçinin Qarabağ və Şərqi Zəngəzurda paralel şəkildə davam etdirir.

İstinadlar Report

Şuşa və Xankəndidə ətrafı çirkləndirən 46 nəfər məsuliyyətə cəlb olunub.

Bu barədə Daxili İşlər Nazirliyinin (DİN) Mətbuat xidmətindən məlumat verilib.

Bildirilib ki, həmin ərazilərdə yaşayan, işləyən və səfər edən şəxslərə təhlükəsizlik qaydaları ilə yanaşı, sanitariya-gigiyena tələbləri izah edilir, onlara məlumatverici yaddaş vərəqələri paylanılır.

Sanitariya-gigiyena qaydaları ilə bağlı vətəndaşların ən çox səfər etdikləri Şuşa və Xankəndi şəhərlərində avqust ayı ərzində ümumilikdə 46 nəfər barəsində İnzibati Xətalar Məcəlləsinin məişət tullantıları və tütün məmulatlarının tutumlardan (urnalardan) kənar yerlərə atılmasına görə məsuliyyətə cəlb olunub. Qaydalara əməl etməyən şəxslərə qarşı inzibati tənbeh tədbirləri davam etdirilir.

Bir daha vətəndaşlarımızın nəzərinə çatdırırıq ki, ərazilərin təmizlik, sanitariya-gigiyena qaydalarına ciddi əməl etsinlər. Zibili, tullantıları urnalardan kənara atmaq qanunla qadağandır və inzibati məsuliyyət yaradır.

İstinadlar Report