Bakıda səkiyə çırpılan avtomobil yanıb.

Bu barədə Daxili İşlər Nazirliyinin (DİN) Mətbuat Xidmətindən məlumat verilib.

Bildirilib ki, FHN-in “112” qaynar telefon xəttinə paytaxtın Yasamal rayonu, M.Müşfiq küçəsində avtomobildə yanğın baş verməsi barədə məlumat daxil olub.

Məlumatla əlaqədar FHN-in Dövlət Yanğından Mühafizə Xidməti Yasamal Rayon Yanğından Mühafizə Hissəsinin qüvvələri dərhal çağırış ünvanına cəlb olunub.

Hadisə yerində əməliyyat şəraiti qiymətləndirilərkən məlum olub ki, idarəetməni itirərək yol kənarındakı səkiyə çırpılan “Toyota” markalı minik avtomobilində yanğın baş verib.

Yanğınsöndürənlərin çevik müdaxiləsi sayəsində yanğın qısa müddətdə söndürülüb.

Yanğın nəticəsində avtomobilin mühərrikinin yanar hissələri və idarəetmə lövhəsi yanıb. Yanğının avtomobilin digər hissələrinə keçməsinə imkan verilməyib.

Azərbaycanda “Toyota Prius” avtomobillərinin iştirakı ilə baş verən yol nəqliyyat hadisələrinin sayının artması müəyyən narahatlıqlar doğurur. Bəzi insanlar hesab edir ki, qəzaların səbəbi bu maşınların düzgün işləməməsi ilə əlaqəlidir. Əslində isə vəziyyət heç də belə deyil. 

Ekspert Elməddin Muradlı bildirir ki, “Toyota Prius” çox təhlükəsiz avtomobildir: “Belə ki, bu model dünyada avtomobillərin təhlükəsizliyini ölçən məşhur NCAP şirkəti tərəfindəndə 5 ulduzla qiymətləndirilib. “Prius” müasir təhlükəsizlik sistemlərinə, qəzaların qarşısını almaq üçün bir sıra təhlükəsizlik funksiyalarına və eləcə də zərərli maddələrin ətraf mühitə atılmasının qarşısını alan bir texnologiyaya sahibdir.

Həmçinin avtomobil 7 hava yastığı ilə təchiz olunub. Qəza əleyhinə yardımçı sistem toqquşmanın qaçınılmaz olduğunu təyin edərsə, avtomobildə bu zaman avtomatik tormozlama baş verir. Həmçinin yaxın və uzaq işıqlarının avtomatik idarə edilməsi, yol xətlərinin tanınması, adaptiv kruiz kontrol, parklama zamanı maneələrin təyin edib avtomatik tormozlaması və hətta yarı avtomatik parklama texnologiyası da mövcuddur”.

“Toyota Prius” avtomobillərinin ekologiyaya göstərdiyi təsirdən danışan Elməddin Muradlı insan həyatının təhlükə altında olmadığını bildirib: “1997-ci ildən bu yana dünya miqyasında 5 milyondan çox “Prius” avtomobili satılıb. Elə həmin ildən bu yana ekoloji cəhətdən təmiz avtomobil sayılan bu avtomobil dünya miqyasında 82 milyon ton zərərli CO2 tullantılarının ətraf mühitə atılmasının qarşısını alıb. Bu həqiqətəndə insan sağlamlığı üçün böyük rəqəmdir”.

Qeyd edək ki, 2015-ci ildə aparılan araşdırmada hibrid avtomobil sürən şəxslərin 89%-i özlərini daha çox xoşbəxt və az stressli hesab ediblər.

Avtosfer-az

Müdafiə nazirinin təsdiq etdiyi 2023-cü ilin hazırlıq planına uyğun olaraq Azərbaycan Ordusunun artilleriya bölmələri ilə döyüş atışlı taktiki təlim keçirilib.

Bu barədə Müdafiə Nazirliyindən məlumat verilib.

Təlimdə qısa müddət ərzində yerdəyişmə edərək atəş mövqelərinin tutulması, minaatan və artilleriya qurğularının döyüş vəziyyətinə gətirilməsi üzrə fəaliyyətlər məşq etdirilib.

Praktiki atışların icrası zamanı təyin edilmiş hədəflər yüksək dəqiqliklə məhv edilib və qarşıya qoyulan tapşırıqlar uğurla icra olunub.

Təlimin keçirilməsində əsas məqsəd atəş vasitələrindən düzgün istifadə etməklə tapşırıqların vaxtında və dəqiq icra edilməsi üçün şəxsi heyətin praktiki vərdişlərinin artırılması, eləcə də komandir heyətinin bölmələri idarəetmə bacarıqlarının təkmilləşdirilməsidir.

“Azərbaycan 24” əlavə edir ki, Ordumuzun təlimləri İranın ölkəmizin sərhədləridəki təlimləri ilə eyni vaxta düşür.

Yasamal Rayon Polis İdarəsinin Narkotiklərlə Mübarizə Bölməsinin əməkdaşları tərəfindən həyata keçirilən əməliyyat nəticəsində narkotik vasitələrin qanunsuz dövriyyəsi ilə məşğul olan Amin Kərimli saxlanılıb.

Bu barədə Daxili İşlər Nazirliyinin (DİN) Mətbuat Xidmətindən məlumat verilib.

Qeyd edilib ki, onun üzərinə baxış zamanı 4 kiloqramdan artıq narkotik vasitə heroin aşkar edilib. Amin Kərimli heroini Bakı şəhərində satmaq məqsədi ilə əldə etdiyini bildirib.

Yasamal Rayon Polis İdarəsinin, həmçinin ərazi şöbə və bölmələri tərəfindən fevral-mart aylarında rayon ərazisində keçirilən əməliyyatlar nəticəsində narkotiklərin qanunsuz dövriyyəsi ilə məşğul olan ümumilikdə 33 nəfər saxlanılıb.

Qanunsuz dövriyyədən 18 kiloqrama yaxın heroin, eləcə də digər növdən olan narkotik vasitələr və metamfetamin çıxarılıb. Saxlanılanlardan bir neçəsi narkotikləri sosial şəbəkələr vasitəsi ilə İranda yaşayan narkotik vasitə satıcıları ilə əlaqə yaradaraq əldə etdiklərini bildiriblər.

Aşkar olunan faktlarla bağlı araşdırmalar davam etdirilir.

İstinadlar Report

Qazax rayonunun sərhədyanı bölgədə yerləşən 3 kəndinin içməli su təchizatı yaxşılaşdırılır.

Dövlət investisiyası hesabına həyata keçirilən layihə Qaymaqlı, Aslanbəyli və Kəmərli kəndlərini əhatə edir. Bu kəndlərdə indiyədək su təchizatı sistemləri mövcud olmayıb. Kənd sakinləri suya olan tələbatlarını uzaq məsafədən daşımaqla ödəyiblər.

Təsdiqlənmiş layihəyə uyğun olaraq Qaymaqlı, Aslanbəyli və Kəmərli kəndlərinə içməli su 4 yeni subartezian quyusundan veriləcək. Layihə çərçivəsində nasos stansiyaları və su anbarlarının inşası da nəzərdə tutulub. Hazırda quyulararası, magistral və şəbəkə su xətlərinin, həmçinin anbarların tikintisi davam etdirilir. Layihə çərçivəsində 14 km magistral, 76 km km şəbəkə su xətlərinin inşası layihələndirilib. İndiyədək magistral su xəttinin 2, içməli su şəbəkəsinin isə 53 km-lik hissəsi inşa olunub. Qaymaqlı, Aslanbəyli və Kəmərli kəndlərində əhalinin ümumi istifadəsi üçün 496 ədəd bulaq quraşdırılacaq.

Layihə üzrə tikinti-quraşdırma işlərinin 2023-cü ilin yay aylarında başa çatdırılması nəzərdə tutulur. Yeni yaradılan infrastruktur Qazax rayonunun 3 kəndində 10 minədək sakinin içməli su təchizatını yaxşılaşdıracaq. Qeyd edək ki, hazırda Qazax rayonu ilə yanaşı, Tovuz, Ağstafa və Neftçala rayonlarının kənd və qəsəbələrində içməli su layihələri həyata keçirilir.

Son 20 gündə Azərbaycanda 46 nəfər saxlanılıb, 250 kiloqram narkotik vasitə qanunsuz dövriyyədən çıxarılıb.

Bu barədə Daxili İşlər Nazirliyinin (DİN) Mətbuat Xidmətindən məlumat verilib.

Bildirilib ki, Novruz bayramı günlərində DİN-in Baş Narkotiklərlə Mübarizə İdarəsinin əməkdaşları Lənkəran şəhər sakini Vüsal Tahirovu saxlayıb.

Onun üzərinə və idarə etdiyi avtomobilə baxış zamanı ümumilikdə 62 kiloqram, o cümlədən 23 kiloqram heroin, 7 kiloqram tiryək, 24 kiloqram marixuana və 8 kiloqram metamfetamin aşkarlanıb.

“Bu polisin istirahət günlərində narkotiklərin qanusnuz dövriyyəsinə qarşı həyata keçirdiyi əməliyyatlardan yalnız biridir. Müxtəlif şərti adlar altında İrandan qaçaqmalçılıq yolu ilə ölkəmizə külli miqdarda narkotik vasitələr göndərən şəxslərin Azərbaycandakı dayaqlarına qarşı Baş Narkotiklərlə Mübarizə İdarəsinin əməkdaşları tərəfindən son 20 gündə paytaxt və bölgələrdə keçirilən silsilə əməliyyatlar zamanı 5 mütəşəkkil dəstə, o cümlədən 46 nəfər saxlanılıb, 1 nəfər isə polisə odlu silahla müqavimət göstərdiyi üçün zərərsizləşdirilib. Qanunsuz dövriyyədən 250 kiloqram müxtəlif xassəli narkotik vasitə, psixotrop maddə, elektron tərəzilər və 11 min ədəd ekstazi və metadon həbi çıxarılıb.

Sonuncu silsilə əməliyyatlar zamanı İrandan Azərbaycana narkotik vasitələri qeyri-leqal yollarla göndərən kanallardan daha bir neçəsinə zərbə endirilib.

Saxlanılanlar barəsində həbs qətimkan tədbiri seçilib. Bu şəxslərin daxil olduqları narkoşəbəkənin ölkə daxilində və xaricindəki digər üzvlərinin saxlanılması istiqamətində əməliyyat tədbirləri davam etdirilir”, – məlumatda qeyd olunub.

Fövqəladə Hallar Nazirliyinin (FHN) tərəfindən müharibədən və erməni terrorundan fiziki-mənəvi zərər görmüş vətəndaşlara psixoloji yardım davam etdirilir.

Bu barədə FHN-in Mətbuat Xidmətindən məlumat verilib.

Bildirilib ki, Vətən müharibəsi ilə bağlı psixoloji problemlər yaşayan müharibə iştirakçılarının, o cümlədən qazilərin, doğmalarını itirmiş şəhid ailəsi üzvlərinin, erməni terrorundan fiziki və mənəvi zərər görmüş insanların psixoloji reabilitasiyasının daha səmərəli təşkili məqsədilə Fövqəladə Hallar Nazirliyinin dəvəti ilə yenidən Türkiyədən ölkəmizə gəlmiş 20 nəfərdən artıq peşəkar psixoloq FHN-in mütəxəssisləri ilə birgə fəaliyyətlərini davam etdirirlər.

Belə ki, ötən müddət ərzində 1743 vətəndaşa, o cümlədən 271 uşağa 4773 seans psixoloji yardım göstərilib.

Xatırladaq ki, hazırda Bakı və Naxçıvan şəhərlərində ödənişsiz həyata keçirilən psixoloji yardım üçün vətəndaşlar Nazirliyin “112” qaynar telefon xətti vasitəsilə qeydiyyata yazıla bilərlər.

İstinadlar Report

Son illərdə su anbarlarında, çaylarda, o cümlədən Xəzər dənizində su səviyyəsinin düşməsi “AzərEnerji”nin balansında olan su elektrik stansiyalarında enerji istehsalının azalmasına və sudan soyutma məqsədi ilə istifadə edilən istilik elektrik stansiyalarının fəaliyyətinə ciddi təsir edir. 

Bu səbəbdən də su ehtiyatlarından səmərəli və planlı istifadə edilməsi, Prezident İlham Əliyevin müvafiq sərəncamı ilə yaradılmış su ehtiyatlarından səmərəli istifadə üzrə Komissiyanın fəaliyyəti çərçivəsində koordinasiya olunur.

Eyni zamanda su qıtlığına görə fəaliyyətini dayandırmaq təhlükəsilə üzləşən ölkənin ən böyük elektrik stansiyalarında qabaqlayıcı tədbirlər görülərək kompleks işlər həyata keçirilir. Belə ki, Xəzər dənizində su səviyyəsinin kəskin düşməsinə görə ölkənin ikinci böyük elektrik stansiyası olan 800 meqavatlıq “Şimal” Elektrik Stansiyasında dənizin içərisinə doğru soyuq suyu 8 metr dərinlikdən götürülməsinə imkan verən 540 metr uzunluqda estakadanın və 2 yerdə su nasos stansiyalarının tikintisi aparılır.

Qeyd edək ki, buna qədər “AzərEnerji” tərəfindən “Sumqayıt” Elektrik Stansiyasında 750 metr uzunluğunda estakada və su nasos stansiyası tikilərək istismara verilib. Kür çayında su səviyyəsinin enməsinə görə ölkənin üçüncü böyük elektrk stansiyası olan “Cənub” Elektrik Stansiyasını soyutma suyu ilə təmin etmək üçün su aşıran qurğu tikilib və Şəmkir su anbarında su itkisinə səbəb olmaqla yanaşı real təhlükə mənbəyinə çevrilən 160 metr uzunluğunda 3 tuneldən ibarət su tullayıcı qurğu tamamailə yenidən qurulub.

Qeyd edək ki, ölkədə elektrik enerjisinə tələbatın pik dövrləri yay və qış fəsillərinə təsadüf edir. Ona görə də sudan energetika məqsədləri üçün istifadənin suvarma və kommunal məqsədlər üçün istifadəyə uyğunlaşdırılması həm məhdud su ehtiyatlarına qeyri-suvarma dövründə qənaət etməyə, həm də su elektrik stansiyalarında istehsalın suvarma dövründə artırmağa imkan verir.

Könül Cəfərli ilə “Peşəkar həkim” layihəsinin növbəti qonağı tibb üzrə fəlsəfə doktoru, otorinolarinqoloq, rinoplastika üzrə cərrah Dr. Pərviz Aslanovdur. Müsahibimiz rinoplastika haqqında suallarımızı cavablandırıb.

“Qafqazinfo” müsahibəni təqdim edir:

Arayış

Peşəkar cərrah Dr. Pərviz Aslanov 2006-cı ildə Azərbaycan Tibb Universitetini bitirib. ABŞ, Braziliya, Avropa da daxil olmaqla dünyanın 50-yə yaxın ölkəsində ixtisasartırma kurslarında və beynəlxalq konfranslarda iştirak edib. 15 ildir rinoplastika və burun daxilinə aid bütün patologiyaların müalicəsi ilə məşğul olur.

Azərbaycan Dövlət Həkimləri Təkmilləşdirmə İnstitutunda doktorantura təhsili alıb, elmi  tədqiqat işləri aparıb. 2021-ci ildə otorinolarinqologiya ixtisası üzrə doktorluq dissertasiyasını müdafiə edərək tibb üzrə fəlsəfə doktoru elmi dərəcəsini qazanıb.

Hazırda West Hospital və Bakı Sağlamlıq Mərkəzində fəaliyyət göstərir.

– Estetik burun əməliyyatı üçün yaş həddi varmı?

– Bəli, aşağı yaş həddi var. Xanımlarda 16, bəylərdə isə 17 yaşdan sonra estetik burun əməliyyatına icazə var. Nadir hallarda burun forması və burun daxili problemlər nəzərə alınaraq, bu həddi bir yaş aşağı salmaq olar. Amma yuxarı yaş həddi yoxdur. Ədəbiyyatda 90 və daha yuxarı yaşda əməliyyat olunan pasiyentlər haqqında məlumat var. Mənim indiyədək etdiyim ən yaşlı pasiyentin 72 yaşı olub.

– Qadın, yoxsa kişi idi?

– Xanım idi. Hətta ondan niyə bu yaşda gəldiyini də soruşdum? Əvvəl atasının, sonra da həyat yoldaşının icazə vermədiyini dedi: “Hər ikisi dünyasını dəyişəndən sonra və ölmədən öncə bu arzuma çatmaq istədim”. Çox uğurlu əməliyyat olduğunu qeyd etmək istərdim. 

– Qadın hər yaşda gözəl olmağı arzulayır. Maraqlıdır, son illər kişilər arasında da estetik burun əməliyyatı etdirənlərin sayı artıb.

– Bəli, doğrudur. Hətta artıq kişi və qadın pasiyentlərimin sayının da bərabərləşdiyini deyərdim. Qadınlardan fərqli olaraq, kişilər, sadəcə, düzgün burun istəyirlər. Onlarda burnun uc hissəsi qalxmır, yaxud da kiçik ölçüyə salmırıq. Belə də olmalıdır. Çox nadir hallarda kiçik ölçülü, burnun uc hissəsinin qalxmasını istəyən kişi pasiyentlərim olur. Kişilər burunlarının əməliyyat olunmasının bilinməsini istəmirlər. Ona görə də düzgün bir buruna qane olurlar.

– Qadınlarla işləmək çətindirmi?

– Belə deməzdim. İşini bilən cərrah üçün qadınlarla işləmək çətin deyil. Şəxsən mən heç bir çətinlik yaşamıram.

– Buna necə nail olursunuz?

– Hər şeydən öncə pasiyenti diqqətlə dinləmək, nə istədiyini tam öyrənmək lazımdır. Əgər xanımın istəkləri ilə cərrahın bacarığı, cərrahiyyənin imkanları üst-üstə düşərsə, nəticə də uğurlu alınır. Hər pasiyentə fərdi yanaşmaq çox önəmlidir. Əgər cərrah xəstəyə bir dost kimi yanaşar, real şərtləri, imkanları izah edərsə, arada heç bir narazılıq yaranmaz, nəticə də xanımı qane edər.

– Əməliyyat üçün burun forması necə seçilir?

– Öncə fotolarını çəkir, burun formalarını dəqiqliklə incələyir və endoskopik yolla burun daxilinə baxırıq. Çünki uğurlu rinoplastika tək gözəl görünüş deyil, həm də sağlam bir buruna nail olmaqdır. Əgər burun daxilində bir patologiya varsa, estetik əməliyyat zamanı onu da aradan qaldırırıq. Burun formasına gəlincə isə pasiyentin nə istədiyini öyrənib fotoşopla bir burun təsviri hazırlayırıq. Yəni mümkün burun formasını əvvəlcədən göstəririk. Amma onu da qeyd edim ki, bu nəticəyə təsir edəcək bəzi faktorlar da var. Məsələn, dərinin qalınlığı, daha öncə əməliyyat keçirib-keçirməməsi, burun çəpərindən bizə lazım olacaq qığırdaq qreflərinin miqdarı və s.

Sevindirici haldır ki, son dövrlər pasiyentlər iki məqamı xüsusi vurğulayırlar: burnun uc hissəsi çox qalxmasın və burun arxası çox düşməsin. Demək olar ki, pasiyentlərin 50 faizdən çoxu təbii burun istəyir. Çalışırıq ki, pasiyentlərə təbii və gözəl burun verə bilək. Əlbəttə, sağlamlıq da şərtdir.

– Estetik burun əməliyyatı ilə bağlı ən çox edilən şikayətlər burunların bir-birinə bənzəməsi ilə bağlıdır. Bu nəticə daha çox cərrahdan, yoxsa pasiyentdən asılıdır?

– Hər bir pasiyentin üz ölçüləri, burun forması fərqlidir. İndiyədək eyni ölçüyə malik iki pasiyentə rast gəlməmişəm. Hər bir pasiyentə fərdi yanaşılmalı və onun üzünə uyğun burun forması seçilməlidir. Bəzən pasiyent əlində başqa bir adamın fotosunu gətirir və həmin burun formasını istədiyini deyir. Biz ona izah edirik ki, bu cür burun forması sizin üzünüzə yaraşmaz, biz sizə öz üz cizgilərinizə uyğun daha gözəl burun əməliyyatı edəcəyik.

– Bəs açıq, yoxsa qapalı əməliyyat daha üstündür?

– Bu sualı tez-tez verirlər. Rinoplastika çox inkişaf edib. Hazırda rinoplastikanın 12-yə yaxın növü var. Heç birinə də “ən mükəmməldir” demək olmaz. Hər üsulun üstün və əskik tərəfləri var. Bəzi pasiyentə bir neçə üsulu tətbiq etməli oluruq. Bu, pasiyentin burun forması və burnundakı problemlərlə bağlıdır. Daha yaxşı nəticə üçün hansı üsul effektiv ola bilərsə, onu da seçirik.

– Ən müasir üsullarla əməliyyat edirsiniz. Sizin etdiyiniz əməliyyatlarda ağrı və tampon olmur?

– Bəli. Əvvəlki əməliyyatlarda burun daxilinə sarğı bezindən, yaxud da silikondan hazırlanmış tampon yerləşdirilirdi. Tampon qoyulduğu zaman pasiyent nəfəs ala bilmir və üzündə çox şişkinlik yaranır. Həmçinin tampon ağrıya da səbəb olur. Artıq müasir üsullar və istifadə etdiyimiz ən son texnoloji tibbi cihazlar sayəsində buna ehtiyac qalmayıb. Biz ağrısız və tamponsuz əməliyyat edirik.

– Niyə bəzi əməliyyatdan sonra nəfəsalmada problem yaranır?

– Ona görə qeyd etdim ki, estetik əməliyyatdan öncə burun daxili də yoxlanılmalıdır. Əgər hər hansı bir problem, məsələn, çəpər əyriliyi varsa, o da düzəldilməlidir. Həmçinin burun daxili çox daraldılmamalıdır. Burun çox kiçik ölçüyə salınarsa, bu da nəfəsalmada çətinlik yarada bilər.

– Estetik burun əməliyyatı üçün plastik cərrah, yoxsa lor həkimi?

– Mən lor həkimiyəm, amma 15 ildir peşəkar rinoplastika ilə məşğul oluram. Hər zaman da vurğulayıram ki, kim əməliyyat edirsə-etsin, amma mütləq şəkildə burun daxilinə, burun daxili problemlərə hakim olan bir cərrah olsun. Çünki sadəcə buruna forma verməklə iş bitmir. Bəzi pasiyentlərdə sinusit, poliplər, adenoid, rinit kimi bir sıra burun daxili patologiyalar da olur. Lor həkimi estetik əməliyyat zamanı bu problemləri də aradan qaldırır.

– Estetik burun əməliyyatı üçün doğru cərrahı necə seçməli?

– Mütləq şəkildə araşdırmaq lazımdır. Gözüyumulu, reklamlara inanıb həkim seçmək doğru deyil. Sonra bunun ciddi zərərini görən və ikinci dəfə bizə müraciət edən pasiyentlər çox olur. Seçmək istədiyiniz cərrahı digər həkimlərdən, tibb personalından soruşun. Həkimin əvvəllər əməliyyat etdiyi pasiyentlərdən rəylər almaq ən doğru seçimdir.

Qeyd: Dr. Pərviz Aslanov rinoplastika və burun patologiyalarına aid bütün əməliyyatları yüksək səviyyədə icra edən mütəxəssisdir. Maraqlananlar həkimlə (055) 601-50-50 mobil nömrəsi ilə əlaqə saxlaya bilərlər. Həmçinin https://www.facebook.com/drparvizaslanov feysbuk, drparvizaslanov instaqram və  https://www.youtube.com/@PervizAslanov yutub hesabları ilə də həkimə elektron müraciət etmək olar.

Xəbər verdiyimiz kimi, deputat Fazil Mustafa evinin qarşısında güllələnib.

Həmin görüntüləri təqdim edirik: