“Biz 88-ci ildə 1 milyon-milyon yarım insan erməni işğalına qarşı çıxırdıq, onda bunun hakimiyyətə aidiyyəti yox idi”.
Bu fikirləri Milli Məclisin bu gün keçirilən iclasında deputat Sabir Rüstəmxanlı deyib.
Deputat vurğulayıb ki, bu hərəkatı öz qanında boğan Qorbaçov oldu: “O vaxt Moskvada buna ilk etirazını bildirən də ulu öndər Heydər Əliyev oldu və bütün səsimizi dünyaya çatdırdı. SSRİ-nin dağılmasında ən mühüm rol oynayan hadisələrdən biri Azərbaycan Xalq Hərəkatı idi. İndi tarixdən xəbərsiz, tarixi bilməyən bəzi cavan dostlarımız başda Bəhruz bəy olmaqla (deputat Bəhruz Məhərrəmov –red.) prosesləri bilmir. Bu xalq bizimdir.
Sən bu xalqın tarixinə necə istədiyin kimi ləkə vura bilərsən?! AXC-Müsavat hakimiyyətinin bəli qüsurları olub, tənqid edə bilərsən. Amma müstəqillik aktına biz imza atmışıq, biz imzalamışıq və oturmuşuq burada. Ölüb getməmişik. Ölüb gedəndən sonra ürəyiniz istəyən qədər danışarsınız.
Zəhmət çəkin, götürün Heydər Əliyevin 13-cü cildliyini oxuyun. Onun Xalq Hərəkatına münasibətini oxuyun. Mənim də kitabım var. Bəli səhvlər oldu və Heydər Əliyev gəldi, çox böyük fəlakətdən xalqı qurtardı. Siz indi kor-koranə danışmaqla olmur. Deputat dediyi sözün məsuliyyətini daşımalıdır. Heydər Əliyevi Rəsulzadəyə və ya başqasına qarşı qoymaq lazım deyil. Hərəsinin öz xidməti var.
Rəsulzadə 1918-ci ildə bu dövləti yaratmışdı. Bu bayraq, onlar Rəsulzadənin xidməti idi. Tarix ardıcıllıqdır. Bir tarixi inkişaf etdirmək üçün birini böyüdüb, digərini kiçiltmək olmaz. Heydər Əliyev bütün Azərbaycan şəxsiyyətləri ilə fəxr edirdi. Sən indi başdan tutma hər şeyin üzərindən xətt çəkməklə nə qazanırsan?! Ay cavan oğlan, bununla nə demək istəyirsən?! Mən bir dəfə sənə demişdim ki, bu məsələləri deyəndə adam birinci düşünüb sonra danışar, gözünü yumub ağzını açmaz”.
Zaur Mirzə
