Avstraliya hökuməti müxalifətçi Aleksey Navalnının ölümü ilə bağlı Rusiyanın Federal Penitensiar Xidmətinin bir neçə əməkdaşına qarşı sanksiyalar elan edib.
Avstraliyanın Xarici İşlər Nazirliyinin yaydığı bəyanatda deyilir ki, Rusiya Federasiyasının Vladimir vilayətindəki 6 saylı cəzaçəkmə müəssisəsinin altı işçisinə, Rusiya Federal Penitensiar Xidmətinin keçmiş direktor müavini, daxili xidmət general-leytenantı Aleksey Qiriçevə qarşı maliyyə məhdudiyyətləri və Avstraliya ərazisinə giriş qadağası tətbiq olunur.
“Avstraliya hökuməti Navalnının ölümündən dərin sarsıntı keçirir, kədərlənir və bu sanksiyalar insan haqlarının ciddi şəkildə pozulmasına görə məsuliyyət daşıyanları məsuliyyətə cəlb etmək öhdəliyimizi nümayiş etdirir. Biz Rusiya hökumətini və Navalnının ölümündə əli olan bütün şəxsləri həbsdə saxlamaq üçün tərəfdaşlarımızla işləməyə davam edəcəyik”, – bəyanatda qeyd olunub.
